عاجل.. "موسى": قعدنا من 2011 لـ2014 لا عندنا كهربا ولا بنزين ولا عيش (فيديو)

حذر الإعلامي أحمد موسى، المواطنين من الانسياق خلف دعوات البعض التي تروج للفوضى استغلالًا لأزمة الكهرباء، التي تمر بها البلاد.

وقال موسى خلال برنامج 'على مسؤوليتي' المذاع على قناة 'صدى البلد': 'ممكن نزعل ممكن نضايق ونشتكي من الكهرباء وغيره ولكن وقت الجد البلد أمانة قدام الـ100 مليون'.

وأضاف: 'الأيام اللي فاتت حضراتكم أكيد متابعين وصوتكم موجود وواصل وطول الوقت نتحدث والدولة شايفة والكل شايف، ولكن من الجانب الآخر شايفين الناس اللي بيستغلوا أزمة قطع الكهرباء في أمور ضد مصالح البلد والشعب العظيم'.

وتابع: 'زي ما بقولكم كده بالظبط ممكن تفضفض وتنتقد وأنا انتقد وأتكلم وأقول، ولكن هناك فارق بين أن احنا نتكلم على ده وبين أن حد ياخدنا لطريق اللاعودة وهذا أمر مش هيحصل، أنا بنبه كتير وبتكلم كتير وهناك حملات شغالة الان لمحاولة القفز على ما يجري في موضوع الكهرباء'.

وأوضح: 'مين اللي بيقولوا؟ هما اللجان إياها، نخلي بالنا كويس أوي أنا عارف الشعب العظيم عمره أبدًا في أي لحظة يتخلى عن بلده، موضوع الكهربا بعد 3 أسابيع هيكون من الماضي مش هيكون في قطاع للكهرباء وهنخلص من القصة دي تمامًا'.

وذكر: 'عانينا وقعدنا من 2011 إلى 2014 معاناة ولا عندنا كهربا ولا بنزين ولا عيش والدنيا كانت فوضى وقبل 30 يونيو هددونا وهنقتلكم وهنسحقكم واللي هينزل الشارع هنموته وطلع ثروت حجازي قال وايه المشكلة عشر قنوات ونقفلهم'.

وأكمل: 'تخيل وصل بيهم الجنون لايه؟ دي ناس مكانش عندها مشكلة على الإطلاق تقتل أي حد غير الإخوان، الموضوع هيخلص والكهرباء هترجع والدولة داخلة هتحل وبنتكلم أمبارح على مليار و180 مليون دولار الدولة بتشغل وتدخل ودي أزمة كبيرة مبقولش صغيرة ولكن مخاوفي على بلدي وبعض الناس اللي بدأوا شوية يعني، لا نخلي بالنا'.

واختتم: 'هنفضل نتكلم عن الموضوع كل يوم وطلباتكم كل يوم ولكن وانت بتكلم لازم تخلي بالك من البلد وتخلي بالك من اللي بيحاولوا يسخنوك جدا ويستغلوا ظرف قطع الكهرباء محدش أبدا يطلع يدافع عن موضوع الكهرباء الأمر اللي يمس الناس محدش يدافع عنه، بيمس حياة الناس ولكن أخد بالي وأنا شايف بأخد بالي وأنا بتحرك أخد بالي، مين اللي بيزق مين ليه مصلحة يشعلل الدنيا'.