شوبير يعلق على مستقبل النحاس في الأهلي

علق الإعلامي أحمد شوبير حارس مرمى الأهلي ومنتخب مصر السابق على مستقبل الجهاز الفني المؤقت للفريق الكروي الأول بالنادي الأهلي بقيادة عماد النحاس والذي تم الكشف عنه خلال الساعات الماضية، في حال حسم التعاقد مع مدير فني أجنبي جديد.

وقال أحمد شوبير في تصريحات إذاعية: 'هل جهاز عماد النحاس ممكن يستمر؟ البعض هيقول لي إزاي يعني يا كابتن يستمر، أنا معنديش إجابة للسؤال بس السؤال الثاني ما هو مصير عادل مصطفى؟، ده راجل كان مستمر مع زد كمدرب لما انت جايبه للنادي الأهلي هل هيستمر مع الأهلي ولا لما ييجي مدرب أجنبي قد لا يستعين به؟، طيب هل الأهلي يتريث أكثر في موضوع المدرب الأجنبي، أنا بطرح بس بعض التساؤلات'.

وأوضح شوبير: 'بصوا عماد النحاس مستحيل يمشي من النادي راجل جدع والسنة اللي فاتت عمل معاك الواجب وزيادة وكان له دور رئيسي في فوزك ببطولة الدوري الممتاز وبعدين رجعته مدرب مساعد مع ريبيرو'.

واضاف شوبير: “طيب هل ده جهاز مؤقت ولا الأهلي عامل حسابه إن ممكن الجهاز ده يكمل، أنا معنديش معلومة خالص ولكن الأهلي عنده لحد يوم 25 نوفمبر هيكون لعب 13 مباراة في الدور الأول وهيكون باقي له 7 مباريات فقط ولو كان ضمن السبعة الكبار هيلعب 7 كمان، يعني هيكون نص الموسم عدى، وده معناه إن الأهلي بيجري عشان يتعاقد مع مدرب أجنبي جيد بسرعة”.