نشأت الديهي عن استيراد سيارات بديلة للتوكتوك من الهند: "حصلي إيرور"

عبر الإعلامي نشأت الديهي، عن استيائه من الخبر المتداول بشأن استيراد 200 سيارة من الهند لتكون بديلة للتوكتوك.

وقال الديهي خلال برنامج 'بالورقة والقلم' المذاع على قناة 'تن': 'وزير الإنتاج الحربي المهندس محمد صلاح أعلن عن وصول 200 مركبة بديلة للتوكتوك وتحمل اسم كيوت من الهند خلال أسبوعين ويتم توزيعها للتجربة على المدن'.

وأضاف: 'وزير الإنتاج الحربي قال إن سعر السيارة سوف تحددها شركة جي بي غبور؛ والمستشار الإعلامي للوزير والمتحدث الرسمي للوزارة قال إنه سيتم توقيع عقد تعاون بين شركة حلوان للآلات والمعدات والشركة الدولية للتجارة والتسويق'.

وتابع: 'الوزير أعلن عن سيارات بديلة للتوكتوك وتعمل بالغاز والبنزين؛ لكن الحقيقة أقف أمام الخبر أول ما قريته قلت أكيد هيتم تصنيع سيارة بديل للتوكتوك في مصر؛ وزير الإنتاج الحربي بيقول سيارات بديلة للتوكتوك سعرها مناسب وتعمل بالغاز والبنزين'.

وواصل: 'قريت الخبر وكنت بجري عشان أشوف العربية بتتصنع فين في مصر؛ وألاقي أنه بيقول وصول نحو 200 مركبة بديلة للتوكتوك وتحمل اسم كيوت من الهند؛ معالي الوزير محمد صلاح أنا عطلت؛ عطلان مش عارف افهم؛ أنا حصلي إيرور'.

وأوضح: 'سيادتك تعلن عن عربيات بديل للتوكتوك حلو؛ صنعناها فين كنت منتظر تقولي في مصانع حربية أو مصانع النصر وأنا كنت فرحان أننا هنعمل عربية بديل للتوكتوك طلع هنجبها من الهند؛ فين الخبر؟ فين الجديد فين التوجيهات اللي الرئيس بيقول عليها والصناعة الصناعة'.

وأكمل: 'خلاص بلاش أجيب من الهند وخليني اصنع في مصر؛ اجمع في مصر؛ الغي التوكتوك وأنا فاكر كويس جدا كان في عندي 100 اعلان ان خلاص قربنا نصنع عربية بتلات عجلات وبأربع عجلات وعربية بتشتغل بالغاز والكهرباء؛ يعني كان عندنا خطة لإنتاج سيارة مصرية؛ الريتشة دي هندية؛ الهند انتجت الريتشة او التوكتوك وغزت بيها العالم وبعدين اكتشفنا انها ملوثة للبيئة ومعطلة وانا عايز الغيها واجيب عربية بردو من الهند'.

واختتم: 'طيب مانا افتح الباب للصناعة المحلية واجيب مصنع الهند يعمل هندي صناعة في مصر؟ يارب الخبر يكون اتصاغ غلط يعني أنا بعمل بديل للتوكتوك؛ أعملها في مصر والا أجيبها من الهند'.