وفاة طفل بسبب الباتيناج.. ماذا حدث له؟

حالة من الحزن سيطرت على العديد من الجروبات الخاصة بالأمهات وتربية الأطفال، وذلك بعد وفاة طفل عقب سقوطه على الأرض خلال اللعب بالباتيناج الخاص به.

وفي هذا الصدد، حذرت الطبيبة آية أشرف من ممارسة هذه اللعبة بدون وسائل الأمان، وكتبت من خلال حسابها على “فيسبوك”: “نصيحة دكتورة وأم بتخاف على ابنها، ربنا ما يحرم أي أم من عيالها ولا يوجع قلبها عليهم.. لسه شايفة جروب من جروبات الماميز واحدة منزلة إن ابنها توفي كان بيلعب بالباتيناج ووقع سخن بعدها ودخل في غيبوبة وتوفي الله يرحمه ويصبرها”.

وأضافت: 'ده بيكون غالبا نتيجة ارتجاج شديد في المخ، هو مش بيحصل كتير بس وارد جدا في الألعاب اللي زي ركوب العجل والباتيناج وأي نوع من أنواع السكيتينج على التلج والسكوتر والسكيت بورد بأنواعه'.

وتابعت: 'الأطفال جسمهم أخف وبيقعوا وقعة أطول وبتكون قوية على دماغهم بالذات، فمفيش حاجة اسمها ابني أو بنتي راكب عجلة أو أي حاجة من اللي قلتها فوق بدون خوذة وبروتكشن أو حماية للرأس'.

واستكملت كلامها قائلة: 'ثانيا لو لا قدر الله حصل ووقع الطفل وقعة جامدة على دماغه لازم كل أم تكون بتفهم في الإسعافات الأولية حتى لو مش دكتورة الطفل لازم ينام على ضهره شوية تراقبي التنفس بتاعه والوعي تمام، يروح البيت تراقبيه شهيته بياكل ولا لا'.

واستطردت: 'ظهور أعراض قيء أو سخونية لازم تجري بالطفل على أقرب مستشفى أعمل أشعة وفحوصات ويعملوا معاه اللازم والوقاية خير من العلاج.. الإسعافات الأولية مش رفاهية للأمهات وفي إسعافات أولية مخصوص للأمهات لحديثي الولادة والأطفال'.