مروة عبد المنعم: بكلم ربنا يوميًا وبسأله ليه حبّبني في الفن؟

في لقاء مؤثر عبر برنامج “قعدة ستات” مع الإعلامية مروة صبري، كشفت الفنانة مروة عبد المنعم عن مشاعرها الصادقة تجاه مشوارها الفني، متحدثةً بعفوية عن معاناتها في غياب الفرص التمثيلية، رغم حبها العميق للفن.

قالت مروة خلال اللقاء:

“أنا بتكلم مع ربنا وبقوله: يا رب، أنا نفسي أشتغل، طيب ليه حببتني في الفن؟ ما أنت اللي إديتني الموهبة دي. طيب لو مش عايزني أشتغل أنا راضية، مش معترضة على حكمك، بس نفسي أمثل… إديني دليل أستنى ولا أغير المجال؟”

وأضافت: “أنا بحب لما أدعي أتكلم مع ربنا… بحس إني قريبة منه”.

كما تحدثت عن صراعها مع الأرق والقلق، قائلة:

“أنا بفكر كتير جدًا، متوترة على طول، ومش بنام. حتى لما باخد منوم، بصحى بعد ساعتين. بشتغل كتير في اليوم، بس دايمًا في حالة قلق داخلي”.

وتشارك الفنانة مروة عبد المنعم حاليًا في مسلسل “بقينا اتنين”، الذي يُعرض في 15 حلقة، ويجمعها بكوكبة من النجوم منهم شريف منير، رانيا يوسف، وميمي جمال. وتدور أحداث المسلسل في إطار اجتماعي لايت حول زوجين يمتلكان شركة دعاية وإعلان، تنتهي علاقتهما بالطلاق، وتستعرض الأحداث تداعيات الانفصال وتأثيراته النفسية.

المسلسل من تأليف أماني التونسي، إخراج طارق رفعت، وإنتاج كريم أبو ذكري بالتعاون مع الشركة المتحدة للخدمات الإعلامية

كما كشفت مروة عبد المنعم، عن تفاصيل تعرضها للنصب من مهندس ديكور قائلة: كنت عايشة في شقة إيجار وكان لازم أمشي خلال شهرين علشان رفعوا الإيجار أوي، وكان عندي شقة على المحارة ومكنش معايا فلوس أخلصها، وكان في مهندس ديكور عاملي حاجات غلط جبت مهندس غيره وقولته الغلط ده نشيله.

وأوضحت مروة عبد المنعم : مكنش معايا غير مبلغ صغير وقولتله كل ما تشتغل هديلك فلوس، هو اشتغل على الغلط والفلوس اللي خدها محاسبش الصنايعية ومعمليش حتى الأبواب، وقعدت في شقة من غير سقف ولا باب، وكنت بقولهم أنا عايزة أعيش، ولقيت في مبلغ كبير أوي عليا واضطريت آخد قرض علشان أسدد.

واستكملت مروة عبد المنعم: أنا معنديش راجل اتسند عليه، واللي عندي هيخاف أقوله أنا عايزة فلوس، والناس خبطت عليا قالولي الحمام بينقط قولتلهم قسما بالله ما هعمل حاجة، حسبي الله ونعم الوكيل، عشان شايفين أني لوحدي مفيش حد هيقدر عليهم.