مينا مسعود: فيلم في عز الضهر أهم من علاء الدين بالنسبة لي

عبّر الفنان الكندي المصري مينا مسعود، عن سعادته البالغة بالمشاركة في فيلمه المصري الجديد 'في عز الضهر'، مؤكدًا أن هذه التجربة تُعد بالنسبة له أهم من بطولته لفيلم 'علاء الدين' الشهير من إنتاج ديزني، واصفًا عودته للعمل في مصر بـ'حلم من أحلامه'.

وتابع خلال حواره مع الإعلامية منى الشاذلي على قناة 'ON': 'أنا فخور جدا بعلاء الدين، لكن فخور أكثر بفليمي هنا، وأنا راجع مصر من أجله لأنه حلم من أحلامي، لذلك هو بالنسبة لي أهم من علاء الدين'.

واستكمل: 'أنا حبيت التمثيل والفن من مصر، الناس مش مقدرة قوي، لما إحنا هاجرنا كندا أنا مكنتش بتفرج على حاجات أمريكية خالص، ماما وبابا كانوا على طول بيشغلوا المسلسلات والمسرحيات والأفلام المصرية، فأنا من صغري لما حبيت التمثيل حبيته من عادل إمام وإسماعيل ياسين وعبد الحليم، فبالنسبة لي أنا فعلا حققت حلمي دلوقتي، اللي أنا جاي مصر وعملت فيلم مصري'.

أكد 'مسعود' أن تجربة التصوير في مصر تختلف تمامًا عن ظروف الإنتاج في هوليوود، موضحًا: 'صورنا يوم كامل 24 ساعة'.

واختتم حديثه مؤكدًا قوة مصر الفنية وقيمتها في عيون صناع السينما، قائلا: 'الناس بتصور في المغرب والأردن، لكن مصر عندها حاجات عظيمة، والناس بتتبسط جدا لما بتيجي هنا'.