متصلة تهاجم مروة عبد المنعم: انتي واخدة مكاني.. والأخيرة: «أنا قعدت هنا بتعبي»

مروة عبد المنعم.. تصدرت الفنانة مروة عبد المنعم، التريند على محرك البحث «جوجل»، بعد هجوم أحد المتابعين لها أثناء عرض حلقة برنامجها «تفاحة مصرية» أمس الثلاثاء.

وتعرضت مروة عبد المنعم، للهجوم الشديد من قبل متصلة، تدعى «عبير»، خلال حلقة برنامجها «تفاحة مصرية»، حيث قالت لها: «أنا عندي مشكلة مع الناس اللي بتشتغل مهنة تانية غير مهنتها».

وأضافت المتصلة لـ مروة عبد المنعم: «حضرتك مثلا شغالة مذيعة وأنتي ممثلة.. معرفش تيجي إزاي.. وأنا عندي 27 وخريجة إعلام وقاعدة مبشتغلش عشان حضرتك واخدة مكاني».

وتابعت المتصلة: «عملتي حلقة عن أين اختفت الأنوثة والنهاردة طالعة بجينز وبنطلون وكوتش، المفروض نسأل حضرتك أين اختفت المذيعة، زمان كانت بتلبس بدل وشعرها مهندم، أنت إزاي طالعة على الشاشة كده؟ هو ده يليق بالإعلام؟».

وردت مروة عبد المنعم، على المتصلة، قائلة: «أنا قعدت هنا بتعبي، واشتغلت على نفسي 25 سنة، مشكلتك حاليًا انك اتخرجتي من إعلام ومش لاقية شغل فبتهاجمي أي حد، المفروض بدل الهجوم تدوري على حلول، مش تهاجمي نجاح الآخر».

وقالت مروة عبد المنعم: «أنا خريجة معهد فنون مسرحية، ينفع أعمل كل حاجة، أمثل، أقدم برامج، اشتغل دوبلاج، في الإذاعة، لأني خريجة المعهد والقلائل جدًا إللي بيعرفوا يدخلوا هذا المعهد».

وأضافت مروة عبد المنعم: «أنا كنت مندوبة مبيعات بلف على البيوت، اشتغلت سمسارة، سكرتارية، اشتغلت في الاعلانات، لكن كنت حاطة هدف اني هبقي ممثلة».

واختتمت حديثها قائلة: «أنا اشتغلت على نفسي، وبقيت مذيعة بسبب تعبي، من غير ما أحقد على حد، لو كنتي اعلامية شاطرة كنتي تابعتي الحلقات قبل الحكم عليا، وانا متأكدة ديمًا أن الشاطر هو اللي هينجح ويوصل».