شردي عن إغلاق السفارة البريطانية: أنت مش مندوب سامي والمعاملة بالمثل

أكد الإعلامي محمد مصطفى شردي، أن قرار إزالة الحواجز أمام السفارة البريطانية بالقاهرة منح حرية الحركة للسيارات في شارع رئيسي من شوارع العاصمة.

وقال شردي خلال برنامج 'الحياة اليوم' المذاع على قناة 'الحياة': 'بيقولوا إن السفارة البريطانية أعلنت إغلاق أبوابها بعد إزالة الحواجز الأمنية ليه؟ هو حد طلب من حضراتكم تقفلوها؟ هو في حد قرب لكم؟ هو أنتم مش متأمّنين داخل الأسوار وخارج الأسوار؟'.

وأضاف: 'إيه اللي يزعلكم إن بعد سنوات من معاناة أهل المنطقة يتم رفع هذه الحواجز، وترجع الحياة لشكلها الطبيعي في بلد آمن تماما؟ إيه اللي مضايق حضرتك؟ هو حد قرب لك؟ ولا حد جاب مقشة وحطها على بابك؟ ولا حد هاجم سفارتك؟'.

وتابع: 'أنا مش فاهم الرد البريطاني لكن اللي عايز أقوله أنتم اتعودتوا على الاكستريمز، مع إن حضرتك خلاص مش مندوب سامي، دي سفارة زي أي سفارة، ولك كل الحق تكون آمن جوه سفارتك وبرّه سفارتك في بلد آمن تماما'.

وواصل: 'الموضوع بسيط كلم أولادك اللي منزلهم قدام السفارات المصرية في كل حتة، وقل لهم ما يقربوش هو مش أنتم اللي بتدوا أوامر للعيال دي؟ كلم الـ MI5 واطلب منهم ميبعتوش حد قدام سفارتكم هو أنتم مش اللي بتحركوا السيرك ده كله في العالم؟ وطلعنا اكتشفنا إن السيرك ده تبعكم، بيرفع أعلام إسرائيل، وما بيهاجمش غير سفاراتنا إحنا'.

وأكمل: 'أنا كنت من زمان بدعو للمعاملة بالمثل وقلت في البرنامج ده من أول الأزمة، وفيه أحزاب مصرية طلعت بيانات قالت نفس الكلام كل اللي طالبينه من السلطات المصرية تنظفوا لنا الشارع هو ما قربش من رصيفك ولا منعك من الدخول ولا الخروج فإيه اللي مضايقك؟'.

وأوضح: 'هل أنا أقدر أروح لندن وأقول لهم حطوا حواجز حوالين السفارة الفلانية؟ لا البرلمان عندكم هيرفض، والسلطات هتقول ما ينفعش إذن عندنا نفس الكلام ما ينفعش تقول لي عايز تقفلها، أقفلها هي مش بتاعتنا، دي سفارتك انت'.

وذكر: 'اللي حصل إن سلطات الأمن المصرية قررت تشيل الخوازيق اللي كانت محطوطة في جاردن سيتي فإيه اللي مضايقك لما اتشالت الحواجز من شارع رئيسي في قلب العاصمة، وأنا متأكد إن السفارة والأجهزة البريطانية والإسرائيلية بيتابعوا ردود الأفعال المصرية تابعوا رد الفعل على إزالة الحواجز، وعلى قرار إغلاق السفارة مؤقتا ونتمنى مؤقتا دي ما تطولش، وتفتحوا سفارتكم من تاني'.

واختتم: 'إنما تيجي تقول أنا قفلتها لأن الحواجز اتشالت؟! دي كانت حواجز في الشارع العام، مش جوه سفارتك الحمد لله الناس في المنطقة اتنفسوا، والمرور رجع طبيعي بعد أزمة سنين بسبب الحواجز دي الحمد لله خلصنا من الحدوته'.