كشف أحمد شوبير كواليس اختيار جائزة أفضل لاعب داخل القارة الأفريقية، والتي توج بها الجنوب الأفريقي رونوين ويليامس، حارس مرمى صن داونز.

وقال شوبير، خلال فيديو نشره عبر حسابه على موقع فيسبوك من تصريحاته الإذاعية: “كان التنافس بين رونوين ويليامس، حارس مرمى صن داونز، وأحمد سيد زيزو، لاعب نادي الزمالك، وحسين الشحات، نجم نادى الأهلى”.

وأضاف: “وأنا داخل بدأت أشعر أن سهم رونوين ويليامس هى الأعلى من غير ما حد يقول وقابلت كابتن حسين لبيب وزيزو ووصلوا قبل الحفلة بساعتين من إسطنبول وكانت رحلة مرهقة وكان عندهم حماس، وزيزو بالأخص كان عنده عشم كبير وده لأنه يستحق وأنا من المحبين ليه لكل حاجة”.

 وتابع: 'ولما جم يعلنوا عن أفضل لاعب وهو رونوين ويليامس الناس بدأت تجيب صورة من هنا وهنا شوف رد الفعل، أكيد واحد رايح على أمل أفضل لاعب هيبقى وشه زعلان، وكان فيه هتافات داخل الحفل وناس كتير خرجوا و سفروا أول ما عرفوا النتيجة وكان في حالة غضب وكمان من الصحافة'.

واستكمل: “قابلت كابتن لبيب وقلتله هاردلك معلش، وبعدين روحت لزيزو وطيبت خاطره وقلتله متضايقش إنت راجل الناس كلها بتشيد بيك وبأدائك والسنة دى مخدتهاش السنة الجاية تكون موجود بقوة، و الحقيقة هو تقبل الأمر بشكل كويس، بالتأكيد زعلان لكن اسمه موجود من المرشحين”.

وأكد: “كنت فخورا جدا وسعيدا لفوز النادى الأهلى واتمنيتها لزيزو لما عرفت إنها محصورة بينه وبين ويليامس، وهنا بقى طلعت الحتة المصرية أى شخص بينسى أهلى وزمالك وبتكون في حالة فخر لبلدك”.

واختتم: 'اتكلمت مع ويليامس و هو شاب فى منتهى الأدب والأخلاق وعارف اللعيبة فى مصر وعارف مصطفى شوبير بشكل جيد'.

فاز رونوين ويليامز، حارس صن داونز، بجائزة أفضل لاعب داخل قارة أفريقيا لعام 2024 في حفل الكاف المقام في المغرب.