أكد الفنان مصطفى كامل نقيب الموسيقيين أنه عازم على إيقاف كافة المخالفات التي يرتكبها البعض في مجال الموسيقي والغناء مشيرا إلى أن النقابة تجري تحقيقات مع عدد من الفنانين في الوقت الحالي.

وقال كامل في مداخلة مع برنامج 'آخر النهار' المذاع على قناة 'النهار': 'أنا مصر أقوم بكل ما يحدث على الساحة الفنية، النقابة حاليا يدار فيها تحقيق من الساعة الرابعة مع أعضاء ارتكبوا مخالفات'.

وأضاف: 'النهارده كان فيه تحقيق مع اثنين أعضاء عاملين، وتحديدا بأسمائهم رضا البحراوي ومحمود الليثي، وإن لم يكفوا عن الشعارات سيتم شطبهم نهائيًا من نقابة المهن الموسيقية أنا هضبط الأوضاع بأمر الله في مصر قدر الإمكان في فترتي، علشان أترك النقابة دي وأنا مأمّن على أولاد مصر من أي شيء يسيء لهم'.

وتابع: 'مقعد النقيب لا يقل قيمة عن أي وزارة، الموسيقى والغناء دي إحنا أصلها مصر أصلها أم كلثوم وعبد الحليم وعبد الوهاب وبليغ، مش هينفع اللي حاصل في مصر خالص من شعارات ومش عارف إيه، وابعتها له واديها له، الحاجات دي كلها، لو أنا ما نهيتهاش أبقى لا أستحق الكرسي اللي أنا قاعد عليه ده'.

وواصل: 'عايز اطمن كل اللي بيسمعني وكل المهتم بالشأن الموسيقي نقابة المهن الموسيقية في وضع سليم جدًا، بس أنا بقيت أبتعد تمامًا عن الأخبار الصحفية الكتيرة، أنا عمال بشطب في سرية تامة، أنا أديت فرص كتيرة لشباب، وقلت دول ولاد بلدي، ولاد موهوبين، واختصروا الطرق للصعود تعالى يا ابن الناس، اقعد يا حبيبي، انت موهوب، قدم فنك، فتحت الباب لكله، لكن كل من أثبت لي إنه لا يستحق إنه يكون موجود، لا، دي كده انت مش موهبة'.

وأوضح: 'اتشطب من بتوع الأداء الصوتي، دول تلاتة، وإن شاء الله بكرة وبعده فيه تلاتة أربعة كمان مش هيشوفوها تاني خالص والناس دي جات النهارده لأن أنا كنت لسه محقق معاهم الفترة اللي فاتت، وقلت موضوع الشعارات بتاع ابعتها له واديها له، مش عارف قول لمامته إيه، وأقول بلفظ بقى مش كويس، بيكرروه، أنا بتكرراني ليه؟، ده استهتار بمصر، ولا استهتار بالنقابة، ولا استهتار بمين؟'.

واختتم: 'هتشوفوا عقوبات رادعة، لأنهم أعضاء جمعية عمومية، فبالتالي لهم طرق للمحاسبة غير بتوع الأداء الصوتي'.