أكد الإعلامي أحمد موسى أن دور الرقابة على المصنفات الفنية مهم للغاية، مشيرا إلى أن تدخل الدولة في هذا الإطار يأتي للحفاظ على الذوق العام.

وقال موسى خلال برنامج 'على مسؤوليتي' المذاع على قناة 'صدى البلد': 'كان عندك مشكلة التمويل والنهاردة الرئيس بيتكلم عليها وأكيد من خلال اللجان الفترة القادمة اللي رئيس الوزراء بيتكلم عليها وبيشكلها هنجد كل الأفكار اللي ممكن تطرح'.

وتابع: 'هذه الصناعة بنشتغل عليها وكل واحد في الدولة عليه دور وفي الأخر أنت اللي عندك الأساس ومينفعش هذا التاريخ ميبقاش موجود أو يقدم صورة غير حقيقة عن بلدك مينفعش في أي مكان'.

وواصل: 'تجارب الدول ايه هي؟ اللي بيصور مسلسل أو فيلم هل أنت سايب الموضوع سداح مداح يعني؟ يصور زي ماهو عايز ويبث وينتج كيفما شاء؟ طالما اديته تصريح للتصوير يبقي أنت مسؤول لحد ما يخلص واللي مش عايز خلاص شوف حته تانية'.

وأكمل: 'العالم كله كده مفيش دولة بتسيب كل واحد يعمل اللي هو عايزه أنت بتتكلم على شكل ومجتمع وهذا المجتمع أنت عايز تقدمه إزاي؟'.

وذكر: 'الفترة اللي تم تغيير فيها رئيس الرقابة على المصنفات الفنية وكان وقتها الدكتور خالد عبد الجليل وحاليا عبد الرحيم كمال، الفترة اللي حصل فيها التغيير كانت فترة شديدة الصعوبة وأنا بخاطب الدكتور أحمد فؤاد هنو وزير الثقافة الفترة دي اللي حصل فيها التغيير اعتقد في ديسمبر هي دي اللي الناس بتبدأ تتكلم فيه على شغل رمضان فحصلت الفجوة بين أنه حد مشي وعشان حد يجي وفي قائم بالأعمال مع كل التقدير للناس كلها الفترة دي'.

واختتم: 'أتمنى رئيس الوزراء مع الملف اللي بيتشاف يشوف الملف كله على بعضه حتى لا يتكرر أنه مجتمع النهاردة يبقي في صورة تنقل أو تسجل أو تتمثل على المجتمع المصري بصورة غير حقيقية'.