البحيرة - أحمد نصرة:

اعتاد المصريون ربط أعيادهم واحتفالاتهم سواء الدينية أو الاجتماعية بطقوس غذائية وأطعمة بعينها، واحدة من تلك الطقوس هي تناول الفطير في يوم رأس السنة الهجرية.

والفطير أكلة تعود جذورها إلى المصريين القدماء، حيث كانوا يقدمونها كقرابين، ويضعونها في مقابرهم، وتحولت في العصور الحديثة إلى طقس يصاحب رأس السنة الهجرية، ويعتبر الكثيرون فتح الفطير في بداية العام فألًا حسنًا يجلب معه الخير ويفتح أبواب الرزق.

يقول محمد صبري - صاحب محل فطائر فى البحيرة: ' إحنا طلعنا لقينا آباءنا وأجدادنا بياكلوا الفطير في رأس السنة، كل الناس بتسيب اللحمة والسمك وتاكل فطير، فيه إللي بياكله بالعسل أو المربى والقشطة، وفيه اللي بياكله بالمورتة أو الجبنة القديمة'.

ويضيف محمد: 'بنشتغل من اليوم إللي قبلها طول الليل ومش بننام عشان نقدر نلبي جميع الطلبات والحجوزات، فيه ناس بتبقى عايزة تفطر بيه وناس تانيه بتتغدى أو تتعشى بيه'.

وتابع محمد: 'الفطير صنعته مش سهلة، ومش أي حد يعرف يطلعه مورق وخفيف، ولازم يتعمل بالسمنة البلدي عشان يطلع حلو'.

وعن أسعار الفطير قال محمد: 'فيه فطيرة بتبدأ من 40 وفيه بـ 60 وبـ 80 حسب الحجم، ارتفاع المواد الخام أثر على السعر طبعا، بس الناس برضه بتشتري، اللي كان بياخد 4 بقي بيكتفي بـ 2 أهم حاجة كل واحد يفرح أسرته'.

من جانبه قال المواطن سليم العوام: 'الفطير لازم نجيبه كل رأس سنة هجرية، عادة صحينا لقينا أهلنا بيعملوها، ومكملينها مع أولادنا وبيفرحوا بيها'.