كشف محمد إبراهيم كيشو، لاعب المصارعة، تفاصيل اتهامه بالتحرش خلال مشاركة في دورة الألعاب الأولمبية التي أقيمت في باريس.

وقال كيشو خلال برنامج 'الماتش' المذاع على قناة 'صدى البلد': 'كانوا 36 ساعة صعبة عليا خاصة أني أول مرة أكون في موقف زي ده وكنت مصدوم من اللي حصل، أنا كنت قاعد في مكان انتظار وكانوا بيحققوا معايا واستنوا لما جابوا كاميرات المكان وبعديها سيادة السفير في فرنسا بعتلي محامي على القسم'.

وأضاف: 'الوقت كان صعب بجد والحمد لله أنا كنت متأكد وواثق أنى معملتش حاجة زي كدة وطلبت منهم أنهم يجيبوا الكاميرات وقلتلهم هي اللي هتبين الحقيقة، أنا كنت متأكد ولكن الروتين بتاعهم والإجراءات كانت بطيئة'.

وتابع: 'الشرطة الفرنسية عاملتني كويس وكنت قاعد في مكان نضيف فيه أكل وشرب ولكن الإجراءات كانت بطيئة'.

وأوضح: 'في البداية اتحركنا من القرية ورحنا المنافسات ومرجعتش وقابلت ناس صحابي مصريين عايشين في فرنسا وقعدت معاهم وكنا قاعدين في كافية عادي وفي أوروبا الكافيهات فيها كحول والمكان كان زحمة وأنا كنت معدي وخبطت ومعرفش مين اللي ورايا دي بنت والا ولد وأنا مش واخد بالي أصلا ومكانش في دماغي شيء ودا اللي ظهر في الفيديو ودا الدليل اللي خرجني مكنتش شايف مين اللي ورايا'.

وأكمل: 'كنت مشيت على الباب وهي طلعت ورايا وكانت بتكلمي باللغة الفرنسية ومفهمتش ولكن حد من اصحابي ترجملي اعتذرت لها ومشيت، خرجنا برة ووقفنا والبوليس كان معدي وبعدين شاورت له وقالت لهم اعتدى عليا'.

وذكر: 'بعديها رحت القسم وكنت متهم وبدأنا نشوف الموقف، السفير المصري لما عرف كان موجود هناك وكان معايا ناس من اللجنة الأولمبية ومساعد الوزير والموضوع كان خلص، أول ما دخلت كان معايا مترجم طول الوقت وكانوا بيجبوه بس في التحقيقات وهو قالي الخبر اتسرب في الصحف الفرنسية وأكيد الخبر وصل لمصر وأنا اتصدمت بصراحة دي حاجة مستحيلة'.

واختتم: 'اتصدمت من ردود الأفعال والشعب في إيه يا جماعة انتوا بتحكموا عليا من غير ما تعرفوا؟ ردود الأفعال في مصر في الصحافة والإعلام اتكلموا عن الموضوع بشكل سيء جدًا'.