أكد الإعلامي عمرو أديب، أن هناك حالة من التفاؤل المشوب بالحذر بين المصريين بعد تشكيل الحكومة الجديدة التي شهدت تغييرات واسعة.

وقال أديب خلال برنامج 'الحكاية' المذاع على قناة 'إم بي سي مصر': 'الشق الأول لازم نقول إن في نوع من أنواع التفاؤل المشوب بالحذر، المصريين عندهم تفاؤل ولكن مشوب بالحذر واللي خلي الناس تتفاءل أن في تغيير كبير'.

وأضاف: 'تم تغيير قلب الوزارة الناس بتوع المجموعة الاقتصادية وكل ده يخلي الناس عندها تفاؤل، الناس بتعتبرها صفحة جديدة بيصاحب ده أخبار أن نحن خلال بنقترب من انتهاء قطع التيار الكهربائي في الصيف وعرفنا أن الدولة دبرت المبالغ للطاقة وأن السفن بتاعة الطاقة تأتي لمصر تباعًا'.

وتابع: 'الكلام اللي بيدعو للتفائل أن رئيس الوزراء قال إحنا بنتكلم في أننا نقضي على المشكلة تمامًا، الناس لو لقت أن الكهربا مش هتقطع تاني دا يخلي الناس تتفاءل ومع أخبار الاستثمارات يجعلك تتفاءل، الآن آن أوان التفاؤل وهذه الوزارة أمامها منذ البداية مساندة واضحة من المصريين اللي هو يلا بقى إحنا تعبنا وعايزين نشوف تحسن في الخدمات والصحة والأسعار والتعليم والكهرباء'.

وأوضح: 'أنت متقدرش تقول إن بكرة في تغيير ولا الأسبوع الجاي على الأقل عشان تبتدي تشوف تغيير يبقي شهر أو شهرين، الراجل اللي جاي عشان يتعامل مع الموظفين في الوزارة على ما يوصل لمدام مديحة ومدام عفاف المسألة ليست بالسهولة ولو أنت كفء في فترة شهر أو شهر ونص تبتدي تطلع نتائج'.

وواصل: 'الناس عندها تفاؤل مشوب بالحذر وأرجوكم أنه حكاية الوزير اللي بيشتغل من ستة الصبح إلى 12 باليل أنا مش فاهمها أنا يهمني النتيجة اشتغلت ساعتين أو تلاته أو مجتش خالص أنا يهمني النتائج أنا عايز أشوف تحسن وتغييرات إنما فكرة أصل الناس مقطعة نفسها ومبتنامش أنا عايزك تنام وكل حاجة ولكن في النهاية إديني شغل'.

وذكر: 'الأمر الآخر هو حالة الشماتة اللي بتبقى عند المصريين في الوزراء، شوفت أهو مشي طيروه أهو لبس الجلابية، إيه يا جماعة في إيه أول إمبارح رئيس وزراء هولندا طلع راح راكب البسكلته بتاعته وقالهم مع السلامة وأمبارح سوناك قالهم أنا عارف مكنتش كويس'.

واختتم: 'أكبر تعبير وقفت عنده هو الإطاحة، إطاحة إيه يا جماعة؟ أقل وزير عندك قعد 5 سنوات، وفي وزير من الوزراء بقاله 10 سنين إطاحة إيه دا هو اللي أطاح بينا كلنا في وزير في العالم أو في المنطقة دي بيقعد 8 سنين'.