نشرت الفنانة نورهان تعليقا عبر صفحتها على موقع التواصل الاجتماعى فيسبوك تعلن فيها عن غرق منزلها بسبب المياه.

وقالت نورهان : إمبارح رجعت من بره بفتح الباب سمعت صوت مية مفتوحة بفتح باب الحمام لقيت المية مغرقة الأرض ودواليب الحمام والأدراج والهدوم والفوط والعلاج وعلب الأدوية اللي شارياها من أمريكا بكميات عشان مفيش منها في مصر كله راح'.

وأضافت نورهان : خسائر بالجملة، اكتشفت أن فيه ماسورتين اتكسروا وخرجوا من مكانهم والدنيا غرقانة والمية طالعة بره الحمام ومغرقة نص أوضة النوم و تحت السرير، وقفت مذهولة كدة 5 دقايق وكلمت السباك وأنا بفكر إني لو كنت اتأخرت ساعة واحدة بس بره! زي ما بعمل كل يوم بعد الشغل بأفضل قاعدة بالساعة والساعتين أحيانًا عشان أحضر شغل اليوم اللي بعده.

وأشارت نورهان : كان زمان بيتي كله بالكنب والسجاجيد وكل شيء ضاع.. لطف بيا الله فيما جرت به المقادير زي ما دايما بطلب منه.. قد إيه بينجينا المنجي من كوارث وإحنا قاب قوسين أو أدنى منها، لولا رجوعي في الوقت المناسب كان حجم الخساير تضاعف أضعافا مضاعفة.. الحمدلله على كل شيء.

وكانت نورهان تعرضت لهذه الأزمة من قبل حيث علقت عليها سابقا قائلة : رجعت من سفرية أمريكا الخامسة والأخيرة لقيت النجفة بتاعت الكويدور واقعة، والإزاز متكسر في كل حتة على الأرض، ورجعت من سفرية اليونان، اللي كانت 3 أيام بالعدد، لقيت دولاب المطبخ اللي متعلق عالحيط وقع وكل الصيني والإزاز مرمي على الأرض متكسر.