أكد الدكتور وليد رشاد، أستاذ علم الاجتماع بالمركز القومي للبحوث الاجتماعية والجنائية، أن السوشيال ميديا تسببت في خلق صورة مزيفة لمجتمعنا، مما أدى إلى انقسام حتى في نظرتنا لأنفسنا كمصريين.

وقال أستاذ علم الاجتماع بالمركز القومي للبحوث الاجتماعية والجنائية، خلال حلقة حوار مع الإعلامية مروة شتلة، ببرنامج 'البيت'، المذاع على قناة الناس، اليوم الأربعاء: 'بقى فيه هزار بيتقال: دول من مصر ودول من إيچيبت! وده مش هزار بس، ده نتيجة صورة مشوهة صدرناها لنفسنا قبل ما نصدرها لغيرنا'.

وتابع: 'ابني نفسه اتعرض لموقف مع واحد من اللي بيعملوا محتوى على السوشيال ميديا، وكان متفق معاه يقول كذا في فيديو، وفعلاً طلع الموضوع كله هزار وفبركة'.

وأضاف أن هذه الصورة الزائفة التي تقدم على أنها تمثل الواقع المصري، ليست هي مصر الحقيقية، مؤكدًا: 'المشاهد اللي بنشوفها مش حقيقية.. دي مش مصر اللي احنا عايشين فيها، والمجتمع اللي بيصدر ده بيخلق فجوة بين الواقع والخيال'.

وشدد على أهمية دور الأسرة في مراقبة وتوجيه أولادهم قائلًا: 'ياريت كل الناس تبقى قريبة من أولادها، نوجههم ونتابع سلوكهم على السوشيال ميديا، ما نسيبهمش لوحدهم في ساحة مفتوحة مليانة صور وأفكار مزيفة'.

وأردف: 'الجميل دلوقتي إننا بدأنا نميز.. نعرف إيه ينفع نشاركه وإيه لا.. نعرف نفرق بين الصح والغلط، احنا عايزين استخدام آمن، مش وسيلة للتفاخر ولا للمنظرة، مش عايزين نحولها لمساحة لتزييف الواقع، أو لتقديم صورة غريبة عن هويتنا ومجتمعنا'.

وأضاف: 'في ناس بتقدم نفسها بصورة مثالية على السوشيال ميديا، بيحطوا صور فيها وعظ وأحاديث دينية، وفي الواقع سلوكهم ممكن يكون عكس كده تمامًا، ده نوع من أنواع التزييف.. حتى في السلوك، الحقيقة مش كده.. مش لازم نعيش بفلتر، ولا نبقى شخصيات مش حقيقية.. الأمور أبسط من كده بكتير'.