تحدث زياد حجاج أبو جبل، لاعب منتخب مصر للمصارعة الحرة للشباب، عن تفاصيل أزمته الأخيرة التي أثارت جدلًا واسعًا، في أول ظهور علني له منذ مغادرته بعثة المنتخب في سلوفاكيا عقب مشاركته في بطولة العالم للشباب.

وقال زياد حجاج عبر حسابه على موقع التواصل الاجتماعي فيسبوك: 'أنا اللاعب الدولي زياد حجاج أبو جبل، لاعب منتخب مصر للمصارعة الحرة'.

وأضاف: 'أنا عايز أقول لأبويا وأمي ما تزعلوش مني، أنا عملت كده علشان أبقى في نظر نفسي راجل، مش هرجع مصر بلدي الحبيبة إلا وأنا مشرفها'.

وتابع زياد: 'سامحوني، أنا تعبت كتير وتعبت أبويا قوي معايا، أنا كلفته كتير، وهو معاه سبع إخوات غيري، وما كنش ينفع غير إني أرجع مصر ومعايا الميدالية، وإن شاء الله هيحصل، حبيت أطمنكم عليا، إن شاء الله راجع لمصر وأنا بطل ومشرفها، بالله عليك يا حاج تسامحني وتدعيلي'.

وأردف: 'أنا حبيت أقول لكل اللي ظلمني وظلم أبويا وإخواتي، أنا سفروني لوحدي من مطار القاهرة إلى سلوفاكيا، وما حدش معايا من البعثة، وما كانش في دماغي حاجة، واتصلت بيهم وروحت على البطولة ولعبت، وأنا كنت مصاب في الضلع اليمين، وأصريت ألعب علشان أحقق حلمي وأجيب ميدالية لمصر'.

وواصل: 'أنا كل اللي باخده في الشهر 700 جنيه، وأنا لاعب دولي، هيعملوا إيه ولا إيه؟ ولكن أنا المسؤول عن القرار ده، بعد الضغوط دي كلها ما كنش ينفع أرجع تاني'.

واختتم تصريحاته: 'أنا اتولدت مصارع وهعيش مصارع، رفعت علم مصر وهيفضل مرفوع إن شاء الله.. سامحوني'.