عبر الإعلامي عمرو أديب عن استيائه من ضعف التحرك الحكومي في التعامل مع حادث الطريق الدائري الإقليمي بالمتوفية والذي أودى بحياة 19 شخصا.

وقال أديب خلال برنامج 'الحكاية' المذاع على قناة 'أم بي سي مصر': 'حادث يستدعي تحقيقا وأن وزير النقل يروح هناك ويشوف ايه الموضوع أنت عايز كام يموت؟ متى نتحرك عشان نشوف ايه اللي بيجرا'.

وأضاف: 'الناس هناك قالولنا كل يوم عندنا حوادث فين الوزير؟ فين المسؤول عن الطريق؟ 19 ضحية ايه الرقم ده؟ مؤلم ومزعج لازم يكون في تحرك إنما البيان اللي طالع ايه 200 ألف جنيه لكل قتيل تولع الفلوس'.

وتابع: 'فين بيان الدولة؟ هو احنا ليه عندنا البني آدم رخيص كده القرية دي النهاردة جايبين 19 تابوت عشان الناس اللي ماتوا، أنا مش مكبر الموضوع صغره أنت دول بنات كانوا بيروحوا يشتغلوا باليومية بـ 130 جنيه حياتها راحت على 130 جنيه يا جدعان'.

وواصل: 'فين الراجل المسؤول عن الطريق؟ قولولنا ايه الحكاية؟ الحزن ده والقهر ده لازم البلد النهاردة كان يبقى فيها تعاطف أكتر من كده يا اخي أنتوا بتطلعوا بيانات في اللي أتفه من كده كتير'.

وأكمل: 'زور الناس وروح القرية والا احنا بس بنشتغل في النضيف؟ أنا محتاج المسؤول وقت الكارثة مش محتاجة وقت الفرح انتوا فين ماذا فعلتم؟ أنا لا بتاع تريند ولا ناقص تريندات دا هوة تريند لوحه، الناس واقفه على الأرض طول اليوم محدش واقف معاهم'.

وذكر: 'هما دول مش مصريين؟ واقف ياخد عزاء مين خد معاه العزاء بقي؟ الـ 19 يموتوا؟ ونعم بالله قضاء ربنا طبعا طيب الناس دول حد يطبطب عليهم، اطلع قولنا يا وزير النقل أن في مفيش حاجة أنت شايف أنت شوفت آخر مرة مجموعة زي دي فين؟'.