مفرح الشمري

المسرح «مو» مجرد خشبة وممثلين وإضاءة وجمهور، المسرح حالة إنسانية وفنية، حكاية تنقال قدامك كاملة، بتفاصيلها وشخصياتها وحواراتها، وصعب نحكم على عمل مسرحي من خلال مشهد مبتور أو مقطع انتشر في «السوشال ميديا».

اللي يبي ينتقد مشهد، يشوف المشهد داخل سياقه، يسمع الحوار اللي قبله واللي بعده، يعرف الشخصية شنو كانت تقصد، وليش قالت هالكلام، وشلون انتهى المشهد، لأن أحيانا جملة واحدة، إذا طلعت من سياقها، تعطي معنى مختلف تماما عن معناها داخل العمل.

المشكلة اليوم أن البعض يلاحق تغريدة أو مقطع قصير أو «ريل» انتشر في السوشال ميديا، وبعدها يصدر حكما على مسرحية كاملة، بل يوصل الأمر إلى انتقاد الجهات التي أجازتها والمطالبة بإيقافها، وهو أصلا ما شاف العرض!

احضر المسرح، وشوف العمل كامل، وبعدها انتقده مثل ما تبي، محد يقول لك لا تنتقد، ولا أحد يطلب منك تعجب بالمسرحية أو توافق على كل ما جاء فيها بس تنتقد مسرحية وأنت ما شفتها، وتبني موقفك على مقطع أو كلام متداول، فهذا مو نقد فني، هذا حكم على شيء ما عشته ولا شفته، روح المسرح، اقعد بين الجمهور واسمع الحوارات وشوف الصورة كاملة، وبعدها قول رأيك، لأن المسرح تجربة حية ما ينفهم من شاشة تلفون، واحترامه يبدأ من احترام الحكاية كاملة.. ودمتم.