علق كامل الوزير، وزير الصناعة والنقل على انتقادات البعض لانشاء مصنع لانتاج الزبيب، مشيرا إلى أن البلاد لا تمتلك سوى مصنع واحد بدائي.

وقال الوزير في مداخلة مع برنامج 'حقائق وأسرار' المذاع على قناة 'صدى البلد': 'النهارده جالي معالي وزير الزراعة والمجالس التصديرية للحاصلات الزراعية، والمزارعين، والناس اللي عندهم زراعات عنب وقالوا إحنا عايزين نعمل مصنع عنب يليق بينا، مصنع زبيب'.

وأضاف: 'إحنا بننتج عنب بكميات كبيرة جدًا في النوبارية وفي المنيا وإحنا كده كده بنستهلك زبيب وبنصدره، لكن التصدير بيبقى بجودة أقل وبسعر أقل، لأن المصنع اللي عندنا في منطقة السنطة بدائي جدًا'.

وتابع: 'يعني العنب بيتنقل من المنيا والنوبارية لحد السنطة في الغربية عشان يتصنع ومع ذلك، المصنع بدائي وما بيطلعش زبيب بجودة عالية قلت لهم طب عايزين إيه؟ قالوا عايزين نعمل مصنع قلت لهم فورًا نعمل مصنع طب نعمل مصنع ولا نسيب الزبيب يهدر ويتكلف نقل كتير وما يكونش عندنا إنتاج كافي ونضطر نستورد تاني؟'.

وواصل: 'أنا قلت للناس هنعمل لكم مصنع زبيب على مستوى عالي جدًا مصر تاخد احتياجاتها ونصدر الباقي، ونجيب عملة صعبة، ونشغّل ناس في مزارع العنب والزبيب والمصانع وده هدفنا الأساسي'.

وأوضح: 'لكن يطلع ناس تهاجم… مع الأسف ناس مش فاهمة، أو كارهة وهتفضل كارهة يقول لك ده بيعمل مصنع زبيب طب هو الزبيب حرام؟ هو مصنع زبيب عيب؟ أبدًا دي صناعة غذائية مطلوبة'.

وأكمل: 'في حد ما بيأكلش زبيب؟ لما نصدر زبيب ونجيب عملة صعبة، ده حرام؟ لما نشغل شباب وأهالي في المزارع والمصانع، ده حرام؟!'.

وذكر: 'أنا بقول لكل اللي بيسمعونا لو سمحتوا، ادونا فرصة شوفوا إحنا هنعمل إيه اللي ما عندوش المعلومة، يسألنا لكن ما يهاجمناش ويشتم ويجرّح إحنا برضه ناس، عندنا بيوت وأولاد وأهالي ليه كده'.

واختتم: 'لكن إحنا هنفضل شغالين زي ما قلت قبل كده، لحد ما نمو هيقولوا هو هيفضل وزير لحد ما يموت؟ لأ، أنا ما قلتش كده أنا ممكن أطلع من الوزارة بكرة لكن هافضل شغال، أنا وزمايلي، سواء جوه الوزارة أو بره، في أي مكان. دي مصر، وده حقها علينا'.