أكد أحمد حسن دروجبا، نجم الأهلي الأسبق، أن إمام عاشور لاعب الفريق لا يعاني من إصابة، مشيرًا إلى أن استبعاده من المشاركة أمام برشلونة في المباراة الودية قد يكون وراء حالة الغضب التي يعيشها اللاعب خلال الفترة الأخيرة.

قال دروجبا، خلال لقاء مع الإعلامي محمد طارق أضا ببرنامج «الماتش» على قناة «صدى البلد»: «مليون في المية إمام عاشور مش مصاب، والأكيد إن إمام عاشور زعل من عدم مشاركته أمام برشلونة في المباراة الودية، وأنا بسأل إمام عاشور: أنت عايز إيه؟ أنت مش مانشستر سيتي اللي طالب يضمك يعني!».

أضاف: «أنت جاي لك عرض من كونيا سبور واتحاد جدة، وده مش احتراف بالنسبة لطموحات لاعب في مكانتك، خصوصًا إن عندك 29 سنة، أنت أفضل لاعب في مصر، فتختار تروح تحترف في تركيا؟ ما هو مافيش فرق برضه».

تابع نجم الأهلي الأسبق: «أنت مش جاي لك عرض من برشلونة ولا مانشستر سيتي، والطموح اللي عندك ده مش طموح، يا طموحك يكون في الدوريات الخمسة الكبرى، يا الأهلي، لأنه مش نادي قليل يعني».

أوضح أحمد حسن دروجبا أن إمام عاشور يحصل على مقابل مالي كبير داخل الأهلي، مشددًا على أن التفكير في الأموال فقط قد يؤثر على مستقبل أي لاعب، وقال: «إمام عاشور في الأهلي بياخد فلوس، واللاعب اللي بيبص للفلوس ما بيكملش».

اختتم تصريحاته قائلًا: «أي لاعب بيمشي من الأهلي بينطفي، وإمام عاشور اللي هو فيه دلوقتي بفضل ربنا ثم النادي الأهلي، وأنا رأيي الأهلي يبيع اللاعب ويقول له مع السلامة لأن مش طبيعي يعني لاعب يتمرد على النادي».