انتقد الإعلامي إبراهيم عيسى إضافة مادة التربية الدينية إلى المجموع في مقترح شهادة البكالوريا الذي عرضته وزارة التعليم اليوم.

وقال عيسى خلال برنامج 'حديث القاهرة' المذاع على قناة 'القاهرة والناس': 'في العرض اللي قدمه السيد وزير التعليم وعرضه مجلس الوزراء دخل جوه المواد الأساسية داخل المجموع الكلي أول حاجة إيه؟ الدين، إنتوا بتتكلموا جد؟ هتدخلوا الدين في المجموع؟ إنتوا مين بالظبط إنتوا مع مين وضد مين إنتوا فين'.

وأضاف: 'قولولنا إنتوا مين وبتفكروا إزاي دولة مدنية وقررتوا تدخلوا الدين داخل المجموع الكلي، طيب دلوقتي إحنا داخلين على فتنة لأنه لا أصل امتحان التعليم المسيحي كان سهل جدا لا أصل امتحان التعليم الإسلامي كان سهل جدا'.

وتابع: 'أنت بتعمل مشكلة وتحول التعليم إلى مادة مذكرة وحفظ وخوتونا بالكلام عن مادة الأخلاق وهنعمل مادة للأخلاق والحضارة'.

وواصل: 'أنت حولت الدين إلى مادة للسقوط والنجاح أنت ممكن تطلع طالب مصري مسلم أو مسيحي ساقط في الدين أو موضوع للامتحان وقياس القدرات في الدين؟ هنعمل إيه في التعليم الإسلامي والمسيحي وهنقررها إزاي؟ والمجموع هنا غير المجموع هنا أصل الامتحان هناك كان سهل وهنا صعب'.

وأوضح: 'توافقت مصر في عز سلفيتها كل السنين اللي فاتت دي دا الإخوان معملوهاش أنهم خلوا الدين في المجموع الكلي الإخوان معملوهاش أنت بتعملها بناء على إيه؟ إيه فلسفتها دي بنحول الدين لمادة مذاكرة وحفظ ونعمله امتحان هنمتحن الناس في دينها وامتحان يؤدي لدخولك الطب أو الهندسة'.

واختتم: 'الامتحان القائم الآن الناس بتتعامل معاه ببساطة وأنه أمر إضافي كويس إنما لا يمكن أن يكون منهج الدين محلا للنجاح والسقوط أو اختبار للطالب في دينه'.