علق الإعلامي أحمد موسى على نشاط وتحركات الدكتور بدر عبد العاطي، وزير الخارجية، مردفًا: «أنا معرفش الدكتور بدر بينام إمتى، إحنا أكتر دولة قامت بجولات واتصالات من أجل وقف هذه الحرب، مصر بس اللي بتحرك في عز النار والصواريخ، علشان هي عاوزة أمن وسلامة المنطقة والعالم وشعوبنا العربية».

وتابع الإعلامي أحمد موسى، خلال تقديم برنامج «على مسئوليتي» عبر قناة «صدى البلد»، أن مصالحنا وأمننا القومي ولغتنا واحدة، والمطلوب اليوم أقوى مما مضى، والمستفيد الوحيد من أي خلاف يحدث الآن هو شخص واحد، هو نتنياهو وإسرائيل، معقبًا: «ده العدو التاريخي، وهيفضل العدو التاريخي، بالمناسبة اللي يضرب صواريخ على أي دولة عربية هيكون عدو لنا، إحنا اليوم في أمسّ الحاجة إلى تكاتف ووحدة عربية».

وتابع: في أناس بيحاولوا يعملوا وقيعة وفتنة، ولكن يجب ألا ننساق لهم، ونكون أعلى وأرقى من هذه المحاولات، ولازم ناخد بالنا من هذه التحركات.

واستعرض أحمد موسى مجموعة من العناوين الصادرة عن المواقع العربية والأجنبية والمحلية عن أسعار الوقود والكهرباء وتحركات الدول، وتأثير الحرب الإيرانية الإسرائيلية وانعكاسها على دول العالم.

وأردف أحمد موسى أن نتيجة ارتفاع أسعار الوقود، هناك أكبر مظاهرة اليوم في أمريكا بسبب ارتفاع الأسعار، كما أن هناك زيادة في أسعار الأسمدة الزراعية في أمريكا بنسبة 35%.

وأكمل: في مصر عندنا مفيش جنيه هيزيد على أي شكارة سماد داخل أي جمعية زراعية، شكارة الأسمدة هتاخدها بسعرها، الزيادة هتكون على اللي هيتم تصديره علشان مش حصل زيادة على المنتجات الزراعية، عاوز أكلمكم كمان على كاري أون، سعر الطماطم فيها بـ20 جنيه بس، وبعدين طماطم إيه في الحرب اللي شغالة حاليًا، الطماطم بـ20 جنيه أهو قدامكم على الهواء علشان محدش يقول أحمد موسى قال، يا سيادة الوزير زود سلاسل المعارض ووفر عربيات تلف الشارع، وعندهم لحمة نضيفة جدًا تنافس الماركات العالمية.