خرجت جيهان عبد المنعم، شقيقة الفنانة الراحلة سعاد حسني، عن صمتها لترد على الخطاب المنتشر ومنسوب لشقيقتها، ونفي أسرة العندليب عبد الحليم حافظ زواجهما.

وقالت جيهان شقيقة السندريلا خلال مداخلة هاتفية في برنامج 'تفاصيل' الذي تقدمه الإعلامية نهال طايل على قناة 'صدى البلد 2': 'سعاد مكنتش راضية تقول إنها اتجوزت عبد الحليم، لكن في أواخر أيامها اتكلمت عن جوازهم السري، وقالت إنه كان فيه عقد في خزنتها، طيب هل كانت هتعمل عقد وتخليه في خزنتها لمجرد الذكرى، يعني كانت هتعمل كده ليه؟'.

وأضافت: 'لما شوفت الجواب اللي بيقولوا إنه من سعاد لحليم، قلت فورًا ده مش خطها، وواضح جدًا إنه مش قديم، وبسأل سؤال: هل إحنا طالبنا بميراث علشان يطلعوا جواب زي ده؟'.

وأكدت شقيقة السندريلا: 'الفنانين ليهم خصوصيتهم وأسرارهم، ومعتقدش أن عبد الحليم كان هييجي يقول لابن أخوه الصغير إنه اتجوز سعاد'.