أكد الفنان مصطفى كامل نقيب الموسيقيين أن الفنان راغب علامة تواصل معه بعد أزمة حفل الساحل الشمالي مشيرا إلى أنه شدد على احترام النقابة والجمهور المصري.

وقال كامل في مداخلة مع برنامج 'آخر النهار' المذاع على قناة 'النهار': ' أنا قدرت جدًا اتصال الفنان الكبير راغب علامة، ولأول مرة في حياتي ألاقي حد بعد صدور قرار بدقيقتين، اتصالات مكثفة منه، هو صديق عمر ليا'.

وأضاف: 'الفنان الكبير راغب علامة، ده زميلنا وحبيبنا وأخونا، كان لازم دوري كرجل مسؤول مع مجلس إدارتي، قلت لهم الوضع اللي حاصل ده، صدر قرار النقابة بعد دقيقتين، لما ألاقي الفنان الكبير، أخويا وصديقي راغب علامة، بيبرر، وفي عبارات بقي، أنا طبعًا في غنى عن نشر الرسائل الصوتية أو الاتصالات'.

وتابع: 'راغب بعت لي الرسالة الصوتية، أنا احترامًا للرسالة الصوتية اللي بعتها، قلت له راغب، هل الرسالة دي متاحة للإعلام ولا دي لي أنا شخصيًا؟، قالي الفحوى بتاعك يا أستاذ مصطفى وأنا قبل أي حاجة، أنا عايز أُقدّر ما يحدث داخل حفلات مصر، وإن أنا بتمنى أكون طرف في إسعاد الشعب المصري وضيوف مصر في الصرح اللي حاصل في الاحتفالات اللي حاصلة في الساحل الشمالي، وأُقدّر الشعب'.

وواصل: 'طب يا راغب، السلوك اللي حصل، السلوك مش منضبط، هو اتهم طبعًا المنظمين، وأنا بقي ده بدوري، هنبتدي نخاطب معالي وزير الداخلية، إن شرطة السياحة والمنظمين على الحفلات دي، لازم تكون المصالح دي بتحترم، لأن إحنا مش شبه إن يطلع ستات كده تحضن وتبوس، وده بيبقى غصب عن الفنان، زي ما أقسم راغب إن كان غصب عنه'.

وأكمل: 'الأهم لي أنا بقى كنقيب للمهن الموسيقية، إن أنا باقدر وباحترم جدًا جدًا قرار الفنان الكبير راغب علامة بضرورة مثوله لقرار نقابة المهن الموسيقية فور وصوله مصر، في تاريخ هبقى أعلنه لحضراتكم برضو، بس مش دلوقتي، عشان الراجل ما يجيش النقابة يلاقي حالة الهرج والمرج اللي بتحصل'.

واختتم: 'أنا لن أُعلن عن هذا اليوم إلا بعد ما الراجل ييجي يشرفنا وينورنا، زي ما قال في بيته التاني نقابة المهن الموسيقية'.