أعربت الطفلة حور أحمد، التي تجسد شخصية “سلسبيلة” عن سعادتها بنجاح مسلسل 'برغم القانون' منذ عرضه عبر منصات التواصل الاجتماعي مرورا بموقع البحث الأكثر شهرة جوجل، ثم عبر قناة أون أحدي قنوات الشركة المتحدة للخدمات الإعلامية بجانب عرضه عبر المنصة الرقمية واتش ات.

وتابعت في تصريحات خاصة لـ الدستور قائلًة: 'التصوير في بورسعيد كان حلو، وأهل بورسعيد عسل وكنت فرحانه وأنا بصور هناك.

وقالت: 'أما عن دوري في المسلسل، فاكتر الحاجات اللي عجبتني ولفتت نظري المشهد اللي باهرب فيه من بابا لأن البنت بتبقى أقرب لمامتها وطبعًا بتحبها أوي وبرضو بتحب باباها ، فلما بتكون عايزه تهرب وتسافر القاهره لوحدها دي حاجه مينفعش، بس في جمله عجبتني اوي وأنا أقرأ الاسكربت بتقول (عادي هنسافر زي ما البنتين اللي في المسلسل اللي كنا بنتفرج عليه مع ماما عملوا) فالمشهد ده بيقول للمتفرج إن الكبار واعين أكتر فلما يتفرجوا على مسلسل وولادهم بيتفرجوا معاهم لازم ياخدوا بالهم أوي هم بيتفرجوا معاهم على ايه ولازم لما يتفرجوا على حاجه زي كده يتقال ان ده غلط ومينفعش نعمل كده خالص'.

وأضافت: 'الاعلام والسوشيال ميديا بيأثرواعلى فكرنا، فالمسلسل يلقي الضوء على إنه لازم يبقى في حوار بين الأهل وأولادهم ويكون في رقابه عشان يخلقوا جيل واعي، وبجد بحبهم أوي كلهم وكمان بحب انكل وليد فواز هو بيطلع شرير بس حقيقي طيب، ودي كانت اول مره امثل معاه واتمنى متبقاش آخر مره لانه كان في مشاهد كتير يفضل يفهمني المشهد كويس واحنا بنعمل بروفه مع بعض واقوله طب اقولها كده ويفضلي يقولي اقول ازاي، ورحاب الجمل كذالك وبتفضل تشجعني كتير وتفضل تقولي انتي شاطره اوي وانتي هتبقى حاجه كبيره لما تكبري، وإيمان العاصي بردو وكمان كانت بتقولي إني شبها اوي وهي صغيره وبجد بحبها أوي، وجدو نبيل على ماهر بحبه جدا وبجد هو طيب اوي زي ما بيطلع بظبط وانا وهو بنفضل نتكلم كتير اوي حتى لو مش قبل المشهد او بعده لا احنا لما بنشوف بعض في اللوكيشن، وجدو صبري عبد المنعم بجد عسول اوي ربنا يديله الصحه كان تعبان اوي واحنا بنصور بس بجد بتعلم منو حجات كتير اوي لانه شاطر جدا وبفضل طول البروفه مركزه معاه بجد بحبه، محمد محمود عبد العزيز عسول اوي ولما بيشوفني بيهزر معايا رغم اني مكانش ليا مشاهد معاه بس هو بجد بيعمل روح حلوه اوي في اللوكيشن، محمد القس بردو طيب اوي عكس شخصيه اكرم وهو كمان اللي بيجي يسلم علينا، والمخرج العظيم شادي عبد السلام المخرج لانه مخرج شاطر جدا وكمان اول لما بدخل اللوكيشن بيفضل يهزر معايا ودايما بقعد اتكلم معاه واساولوا هو انا مثلا في المشهد ده متعاطفه مع بابايا ولا مامتى وكان بيقعد يفهمني '.

وأوضحت: 'كل الكاست شاطرين بحبهم ومش عايزه انسى حد، بس حقيقي كنت مبسوطه اوي وانا بصور وبقيت بحس أننا عيله بجد زي عيلتي التانيه'.

يُعرض مسلسل برغم القانون من الأحد إلى الخميس على قناة ON في تمام الساعة 7:30 مساءً، مع إعادة العرض في الساعة 12:30 بعد منتصف الليل.

كما يُعرض على قناة ON دراما في الساعة 10 مساءً، وتُعاد الحلقات في الساعة 6 صباحًا و5 مساءً. يتم أيضًا عرض الحلقات على منصة Watch It قبل العرض على قناة ON بـ24 ساعة.

يشارك في بطولة مسلسل برغم القانون إلى جانب إيمان العاصي، كل من هاني عادل، محمد القس، وليد فواز، جوري بكر، فرح يوسف، رحاب الجمل، عايدة رياض، إيهاب فهمي، ومحمد محمود عبد العزيز، بالإضافة إلى العديد من الفنانين الآخرين. العمل من تأليف نجلاء الحديني، وإخراج شادي عبد السلام، وإنتاج شركة فنون مصر.