علق الإعلامي أحمد موسى على ارتفاع أسعار الليمون بشكل قياسي رغم تراجع أسعار أغلب الخضروات.

وقال موسى خلال برنامج 'على مسؤوليتي' المذاع على قناة 'صدى البلد': 'الليمون النهاردة بـ 120-130 جنيها وتاني بسأل السؤال السنة اللي فاتت كان عندنا أزمة في البطاطس والطماطم والدولة اشتغلت وبقى عندنا البطاطس النهاردة اشترى زي ما أنت عايز والطماطم 6-7-8 جنيه وكانت بـ 2 جنيه في آخر رمضان'.

وأضاف: 'الليمون ازاي يصل إلى هذا السعر؟ هل عندنا مشكلة هل تم التنبيه والا لأ هل السيد وزير الزراعة نبهوا المزارعين بأن هيكون عندنا مشكلة في الليمون وأشجار الليمون، الليمون عندنا مزروع على الترع والمصارف ازاي يوصل الكيلو 120-130 جنيه؟'.

وتابع: 'الناس لا سألت على اللحمة ولا اتكلموا على الفراخ ولا الرنجة ولا الفسيخ والناس كلها ماسكة بتقولك رحت أجيب ليمون لقيته بـ 120 جنيه ومقدرش أجيب كيلو ربع كيلو كويس عشان الاكلة بتاعة بكرة واللمة الجميلة'.

وواصل: 'بكرة استعدادات هائلة في كل الحدائق ووزارة الصحة عاملة استعدادات كبيرة لهذا اليوم'.

وكان حاتم النجيب نائب رئيس شعبة الخضروات والفاكهة قد أكد أن هناك تدني في إنتاج الليمون في مصر بسبب تلف نسبة كبيرة من الأشجار.

وأوضح النجيب: 'لدينا تدني في شجر الليمون بنسبة لا تقل عن 50% وبعض المنتجين الزراعيين قاموا بخلع الأشجار القديمة وزراعة جديدة والليمون لا ينتج خلال شهر أو اثنين ولكن بعد سنة واثنين'.

وذكر: 'لدينا قلة معروض حاليا انعكست على الأسواق وعدم الإتاحة وعدم وجود كميات كافية تعادل الطلب أدت إلى زيادة الأسعار'.