أكد الإعلامي تامر أمين أن التحركات الأخيرة ضد بعض النشطاء على منصة تيك توك المخالفين قد أدت إلى ضبط الأوضاع، مشيرا إلى أن محتوي وسائل التواصل الاجتماعي أمس كان أكثر انضباطا.

وقال أمين خلال برنامج 'أخر النهار' المذاع على قناة 'النهار': 'امبارح لو تفتكروا أنا مبالغتش أبدًا لما قلت لكم بالفم المليان إن الدنيا اتقلبت على الخبر الخاص بالقبض على مجموعة من التيك توكرز والبلوجرز المشاهير، في ضربة أمنية قوية جدًا جدًا، بناءً على بلاغات قُدمت من مجموعة من المحامين'.

وأضاف: 'قلت لكم إن الدنيا اتقلبت، وفعلًا الدنيا امبارح اتقلبت لكن لما قعدت أفكر بالليل شوية اكتشفت إن التعبير اللي قلته مش مضبوط الدنيا ما اتقلبتش، بالعكس، الدنيا اتعدلت اللي حصل امبارح ولسه بيحصل، وأعتقد إن لسه هيحصل، ده في إطار إن الدنيا بترجع تتعدل تاني، الأمور بترجع لنصابها، الشمال هيرجع يبقى يمين'.

وتابع: 'الدليل على اللي قلته ده بسيط امبارح بالليل تعمدت إن أنا أسهر على السوشيال من الساعة 12 لحد صلاة الفجر، وأنا قاعد على السوشيال ميديا، السوشيال ميديا امبارح كانت نضيفة يعني سيبك من الحاجات اللي نازلة قبل كده، أنا ماليش دعوة بيها الحاجات اللي نزلت بعد خبر القبض على التيك توكرز كانت فُلّة لا في محتوى مبتذل، ولا إيحاءات، ولا حتى ناس نزلت محتوى أصلًا، في ناس قعدوا يتفرجوا على روتانا سينما'.

وأكمل: 'دي بداية العدالة، بداية الضبط والربط إحنا قلنا مليون مرة إن القانون والعقاب مش هدفه الأذى، الهدف الأساسي هو الردع العام يعني الناس اللي بتعمل حاجة غلط تخاف وتكُش الردع يعني أخاف وأبعد لما أشوف حد غيري اتعاقب على نفس الغلط'.

وأوضح: 'ده اللي بيعمل السلام والانضباط في المجتمع، إن الناس كلها تخاف من القانون، وما تعملش الغلط مش بنقول نمشي جنب الحيط، ولا نعيش في دولة استبدادية أو ديكتاتورية، لكن مين يزعل إننا نعيش في دولة قانون، يكون القانون هو الفاصل بيني وبينك'.

واختتم: 'حالة الفوضى والإسفاف اللي كانت على السوشيال ميديا، وتحديدًا التيك توك، كان لازم تقف… ووقفت وأنا أتمنى إن القصة ما تتوقفش عند المجموعة اللي تم القبض عليها امبارح والنهاردة الصبح بس لأن الحقيقة مش هم بس اللي غلطوا عندي معلومات من خلال تواصلي مع بعض المحامين اللي قدموا البلاغات، إن فيه بلاغات تانية بأسماء تانية'.