اسمحولي التحدث في هذه المقالة بالعامية.

بقول لكل الناس الجواز مش لعبة، ومش حاجة سهلة، ومش مجرد أحلام وردية عند الولد والبنت أسطورية، بل هي مسئولية كبيرة عمرية تستمر سنوات العمر الباقية، إن نجحت كانت سنوات العمر الباقية سعيدة ومتزنة ومستقرة، وإن لم تنجح إما يحدث انفصال واهتزاز نفسى، أو تكون بقية أيام العمر ضاغطة ومؤلمة نفسيا.

الجواز يبدأ بتعارف طرفين يحدث بينهم قبول وتقبل هدفها المودة والرحمة، وإقامة بيت أسرى، وحياة سعيدة يملأها الدفء والحنان والأطفال، ويكون هدف الشريكين تنشئة أبناء صالحين وتربيتهم وتعليمهم وتوفير احتياجاتهم، إلى جانب توفير أوقات راحة وترفيه للأسرة، ووقت مخصص للنقاش البناء.

الجواز كمان مش طرفين بس دول عيلتين وعائلات تانية حولهم بيتعرفوا، وعلاقات اجتماعية واسعة أوى، وعلاقة نسب بتقوى مع الوقت، فلازم يكون فيها تفاهم وراحة نفسية.

إزاي تخلى حياتك الزوجية مستقرة؟

١- اختيارك الأساسي للشريك قائم على التدين والأخلاق.

٢- التقارب الاجتماعي والتعليمي مهم لتقارب الفكر، لكن ليس قاعدة عامة، لأن بعض الزيجات الناجحة تماما قد تكون من أوساط مختلفة.

٣- بلاش بيت عيلة عشان الخناقات والمشاكل.

٤- أي مشاكل في البيت بلاش تتنقل برة وحلوها جوة بيتكم عشان متكبرش.

٥- لازم فترات راحة وترفيه عشان الملل والروتين ميأثرش على راحتكم النفسية ويسبب الخرس الزوجي.

٦- لازم وقت للنقاش والفضفضة بين الطرفين عشان ميبقاش فيه تراكمات نفسية تكبر مع الوقت.

٧- بلاش تهربوا من مشاكلكم بالانشغال بالفون، وواجهوا المشاكل وحتلاقوا حلول.

٨- بلاش تطلعوا هم الشغل على البيت، اللى فى البيت ملهمش ذنب، حلوا مشاكل كل مكان في مكانه.

٩-بلاش خناقات أمام الأطفال عشان ميقلش احترامهم ليكم مع الوقت أو يقلدوكم.

١٠- في بداية الجواز جهزوا على قدر استطاعتكم بلاش الأوفر (عشان أبقى زي فلانة) كل حد ليه ظروفه، بلاش مقارنات عشان تبقوا مرتاحين وراضيين.

١١- الجواز أساسه الحفاظ على الكرامة والاحترام بين الطرفين والأمانة والصراحة والكرم، أما الجواز اللي فيه خيانة أو كذب أو بخل جواز فاشل.

١٢- لازم تنازلات من كل طرف للآخر عن عاداته قبل الجواز عشان الحياة تمشى، لكن لا تنازل عن الكرامة أو الاحترام، حتى إن لم يستمر الزواج لأى ظرف - لا قدر الله- فسيستمر الاحترام بينهم وتبقى الكرامة'.