علق الإعلامي مصطفى بكري على اتهام الإعلام الإسرائيلية لمصر باختراق اتفاقية السلام وبناء تجهيزات للقوات المسلحة في سيناء.

وقال بكري خلال برنامج 'حقائق وأسرار' المذاع على قناة 'صدى البلد': 'أظنكم متابعين الحملة الإسرائيلية اللي انطلقت يوم التلات اللي فات وطلعت القناة الإسرائيلية الـ14 بكلام ومعلومات الحقيقة أنا شايفها خطيرة جدا، والقناة بتقول إن مصر انتهكت اتفاقية السلام المصرية الإسرائيلية سواء كامب ديفيد أو المعاهدة المصرية الإسرائيلية'.

وأضاف: 'اتنشر في الصحافة والإعلام الإسرائيلية أن المؤسسة الأمنية الإسرائيلية بتقول إن في أنشطة للجيش المصري في وسط سيناء ودا مخالف لاتفاقية السلام، وقالت إن تحضيرات الجيش المصري تتضمن تحضيرات لوجستية وحواجز مختلفة ودا بيمثل خطورة على القوات الإسرائيلية إزاء أي تطورات مستقبلية يعني لما نيجي ندخل سيناء أنتوا هتعملولنا مشكلة'.

وتابع: 'رددوا بردو الكلام اللي بيقولوه أنهم اكتشفوا أكتر من 10 نفاق لتهريب الأسلحة والذخائر من مصر إلى غزة، وأن إحنا لن نتوانى عن إغلاق وضرب الأنفاق'.

وواصل: 'النهاردة سيادتك بتهددني تهديدًا مباشرًا وبتقولي أنت اخترقت اتفاقية السلام وجيشك لازم ينسحب من سيناء إيه الإفترا ده إيه الإجرام ده، إيه التعدي على كل الخطوط الحمراء ده؟ من أنتم أيها الصهاينة دا إنتوا معرفتوش تطلعوا من غزة فاكرين نفسكم قوة جبارة يعني؟ قسما بالله الجيش المصري يديكم علقة عمركم ما هتفكروا فيها'.

وأكمل: 'من أنتم؟ أنت اتجننت يا نتنياهو ولا بتتعامل إزاي؟ دي مصر ودا جيش مصر أنت تطلق إعلامك وتقول الجيش المصري لازم يراجع نفسه؟ أمال اللي أنت عملته في محور صلاح الدين إيه؟ دا المحور حسب الملحق الأمني في اتفاقية السلام المفروض قواتك لا تزيد عن 4 آلاف عنصر ومفيش دبابات ولا مدفعية، أنت جبت الفرقة 162 بكتائبها المختلفة بدباباتها وحطيتها على الحدود'.

وأوضح: 'إحنا وقعنا اتفاقية سنة 2021 وبمقتضاها جرى تعديل اتفاقية السلام وسمح للقوات المصرية بأنها تبقى موجودة لأداء مهام خاصة تتعلق بمكافحة الإرهاب إنما اللي أنت حطيته في فيلادلفيا هو ده التهديد الحقيقي لاتفاقية السلام'.