أكد الفنان أسامة عباس؛ أنه كان مقيدا طوال السنوات الماضية بالوقت مشيرا إلى أنه كان يتحكم في كل تحركاته ولكن حاليا لم يعد يفكر في الوقت كما كان يحدث في السابق.

وقال عباس في مقابلة مع برنامج 'يحدث في مصر' المذاع على قناة 'أم بي سي مصر': 'أول حاجة عملتها أني قلعت الساعة لأن الساعة كانت الـ 55 سنة اللي فاتت اللي متحكمة في حياتي أصحي امتي وأنام امتي واشتغل امتي واعمل كل حاجة طبقا للساعة مش طبقا لرغباتي واستمر ده 55 سنة ولم اخطئ إلا فيما ندر الحمد لله ولكن كقاعدة الساعة كانت تتحكم في تصرفات واستمريت إلى أن قررت أن اقلع الساعة'.

وأضاف: 'كنت سعيد جدا بتكريمي من المسرح القومي ولما يجي التكريم من أبناء بلدي وأبناء مهتني في حياتي بيكون ليه قيمة كبيرة العلاقة بيني وبين احفادي علاقة صداقة حتى أنهم مبيقولوش يا جدي ولكن بيقولولي يا أس أنا من جوايا بكون سعيد باللي بيقولوه وبيعملوه والحمد لله كلهم في شغلهم ناجحين'.

وتابع: 'احفادي لما مبيعجبهمش شغلي مبيقولوليش والاجيال الجديدة مبيعجبهاش أوي الشغل القديم بتاعنا وبيتفرجوا عليه زي ما احنا بنتفرج على التاريخ وبالنسبالهم دا تاريخ نوع الضحك بقي مختلف والايفيه بقي مختلف'.

وأوضح: 'من حق كل جيل أن يختار نوع الفن اللي يقدمه مش من حقي أني افرض عليهم فننا؛ الدنيا اتغيرت لما كنا في الستينيات الدنيا ومصر والحياة كانت مختلفة تماما ولو عملنا الروايات القديمة بالأسلوب القديم مش هتعجب الأجيال الحالية لان نوع ضحكهم مختلف'.