انتقد البرلماني السابق المهندس هيثم الحريري، تكرار استخراج البيانات الشخصية للمواطنين، قائلا إن المواطن بيدفع مقابل نفس الخدمة أكتر من مرة، بدون مبرر حقيقي، وفي وقت أصلًا بيواجه فيه ضغوط معيشية صعبة ودخل غير كافٍ لحياة آدمية كريمة.. المشكلة الحقيقية مش في شكل المكاتب ولا التكييف ولا الكراسي.

وأوضح في منشور له عير حسابه الرسمي على موقع التواصل الاجتماعي «فيسبوك»: «في الوقت اللي الحكومة بتعلن فيه التحول الرقمي، المواطن لسه بيتعامل بعقلية “هات ورق من الشباك”… حتى لو الورق ده بياناته ثابتة ومفيهاش أي تغيير».

يعني إيه شهادة ميلاد يبقى لها “مدة صلاحية”؟

وأضاف: «يعني إيه مواطن يضيع يوم عمل كامل—مواصلات، طوابير، انتظار، وسيستم ممكن يقع—عشان يطلع نفس المستند اللي معاه بالفعل؟ ده مش إجراء إداري… ده استنزاف مباشر، واستنزاف وقت = إنتاجية أقل، واستنزاف فلوس = عبء إضافي على المواطن، واستنزاف ثقة = فجوة أكبر بين المواطن والخدمة الحكومية».

وأوضح: «الأخطر من كده، إن اللي بيحصل فعليًا بقى شبه “جباية مقنّع،.. المواطن بيدفع مقابل نفس الخدمة أكتر من مرة، بدون مبرر حقيقي، وفي وقت أصلًا بيواجه فيه ضغوط معيشية صعبة ودخل غير كافٍ لحياة آدمية كريمة.. المشكلة الحقيقية مش في شكل المكاتب ولا التكييف ولا الكراسي الجديدة.

هيثم الحريري يوضح الحل

ولفت: «المشكلة إن لسه مفيش ربط حقيقي بين الجهات، ولسه الموظف بيعتمد على “الورقة” بدل ما يعتمد على قاعدة بيانات..

الحل مش صعب، لكنه محتاج قرار:

- إلغاء شرط “حداثة” المستندات الثابتة فورًا

- ربط إلكتروني إلزامي بين كل الجهات الحكومية

- تمكين الموظف من التحقق الرقمي بدل تحميل المواطن المسؤولية

- محاسبة أي جهة بتطلب مستند متاح بالفعل داخل الدولة

التحول الرقمي مش شعار… التحول الرقمي اختبار حقيقي لقدرة الدولة على احترام وقت وكرامة المواطن.