كواليس وتفاصيل رسالة محزنة جاءت على صفحة خطيب ريهام الخليفة مضيفة مصر للطيران التي لفظت أنفاسها الأخيرة متأثرة بإصابتها بأزمة قلبية اثناء تواجدها في فندق في المغرب، حيث نعى عبدالله خطيب المضيفة وفاتها برسالة مؤثرة.

رسالة مؤثرة لـ خطيب مضيفة مصر للطيران بعد وفاتها

قال خطيب مضيفة مصر للطيران، بعد إعلانه خبر وفاتها، كنت ديما بفضل اراقب الرحلة بتاعتك وأشوف طلعت أمتى وأقولك يارب يبقى السفر خفيف عليكي وترجعيلي بالسلامة وتبقى في الجو وأقولك يارب تبقى رحلة خفيفة عليكي وميكونش في شيف ولا طيار أو راكب مضايقك.

وتابع خطيب مضيفة مصر للطيران ريهام الخليفة، لما كنت بتنزلي كنت بقولك يارب يبقى لاندنج خفيف عليكي وحشتيني، وأنتي كنتي بتقوليلي وحشتني وميسو ميسو ولافيو لافيو وأفضل مستنيكي قدام البيت لحد ما ترجعي وتوصلي بالسلامة.

واسلم عليكي ونقف قدام البيت زي كل رحلة بس المرة دي مجتيش ومبعتليش تقوليلي لافيو لافيو وحشتني وجيالك ياولا، أنا كنت ساعات بتأخر عليكي شوية وتوصلي قبلي وأقولك خلاص ياحبيبتي متقفيش في الشارع خشي وأنا هاجي ونتكلم في البيت.

وأضاف خطيب مضيفة مصر للطيران، انتي لما كنتي بتتأخري وتقوليلي أصل معانا 3 هينزلوا مدينة نصر الأول وهجيلك ياحبيبي كنت بستنى حتى لو وقفت ساعتين بس دي أول مرة تتأخري وأفضل مستني ومتجيش، أنا مش عارف أقول إيه ولا أوصف أنا حاسس ب إيه قطعتي بيا ووحشتيني جدا.

واختتم خطيب مضيفة مصر للطيران، النهاردة هوصلك بـ إيدي عشان تنامي في مكان لوحدك ومش هعرف ابقى معاكي فيه حتى ولو على التليفون زي ما كنا بنعمل ونفضل سايبين المكالمة شغالة حتى واحنا نايمين ربنا يرحمك يا حبيبتي ويغفر لك ويرزقك الجنة بغير حساب ولا سابق عذاب.

حمد الله على السلامة وعلى وصولك لأخر رحلة تركبيها مسيو مسيو ولافيو لافيو وحشتيني ياريهام حيث كان قد علق بمنشور آخر نعى فيه وفاة خطيبته أثر إصابتها بأزمة قلبية في الخارج.