وجه طارق يحيى، نجم نادي الزمالك السابق، انتقادات لاذعة لمجلس إدارة القلعة البيضاء برئاسة حسين لبيب، بسبب البيان الصادر مؤخرًا حول اللاعب أحمد مصطفى «زيزو»، جناح الفريق الأول.

وكان الزمالك قد أرسل خطابين رسميين إلى كل من الاتحاد المصري لكرة القدم ولجنة الانضباط، يطالب فيهما بسرعة التحقيق في الشكوى المقدمة بتاريخ 4 مايو الماضي، والتي تتعلق بانتهاء عقد زيزو في 1 يوليو المقبل، مؤكدًا أن اللاعب لا يحق له الانتقال لأي نادٍ آخر قبل هذا الموعد.

وفي تصريحات تلفزيونية عبر قناة «النهار»، قال طارق يحيى: 'كمشجع، مش هيفرق معايا إذا كان عقد زيزو بينتهي في نهاية الموسم أو في 1 يوليو، هو كده كده مشي. يعني إيه اللي هيحصل لو ملعبش مع الأهلي في كأس العالم للأندية؟ يروح أو ميروحش، هو خلاص اختار طريقه، ليه أركز معاه'.

وأضاف: 'البيان جه في توقيت غريب، إحنا داخلين على نهائي كأس مصر بعد 3 أيام، دي البطولة الوحيدة اللي الزمالك ممكن يخرج بيها من الموسم، وأنا كمشجع هاموت وأشوف الفريق بيكسبها علشان نحفظ شوية من كرامتنا قدام الجمهور'.

وتابع يحيى: 'إنتوا ناس مسؤولة عن نادي كبير، مش معقول كل شوية نرجع نتكلم عن زيزو، خلاص الموضوع انتهى، ركزوا في اللي جاي، عندنا لاعيبة محتاجين تجديد وصفقات محتاجة حسم'.

واختتم قائلاً: 'أنصح الجميع ينسى قصة زيزو دلوقتي، إحنا مش هنقف عليه، هو مش أول لاعب يسيب النادي، ومش هيكون الأخير، سيبوه في حاله وخلونا نركز في الكأس'.