أعلنت الإعلامية ريهام سعيد، تنازلها عن البلاغ المقدم منها ضد الفنانة ريم البارودي، وذلك بعد توسط المخرجة إيناس الدغيدي، في برنامج «شيخ الحارة والجريئة»، الذي يُعرض على شاشة «القاهرة والناس»، موضحة أنها ستتنازل عن البلاغ: «مش عشان هي مغلطتش أو مش عشان متستحقش ده، إنتو متعرفوش كم الوجع اللي هي تسببت فيه بالكام كلمة اللي قالتهم، والفضائح اللي تعرضوا لها أبنائي بعد الكلمتين دول، بس أنا مش هسيبها تتسجن».
وأضافت «سعيد»، أنها لن تترك ريم الباردوي تُحبس، «مش هتستحمل ولا دقيقة من الدقائق اللي أنا مريت بيها، بس الموضوع مش في إيدي بس، فيه حق لأولادي ولجوزي مش عارفة هيتنازلوا عليه ولا لأ، أنا ميهونش عليا أسجنها، بس الموضوع مش خاص بيا لوحدي»، موضحة أنها لا تحب قط أن تُسبب أذى لأحد، «أنا طلعت من شهرين لايف وقولت عاوزة أتنازل عشان مش عاوزة أي حد يزعل مني، لاقيت ريم بعتت لصحفية فويس بتقولها دي بتعمل كدة عشان تاخد اللقطة وتبان إنها طيبة، طبعًا أنا استفزيت وكملت في القضية».
وأوضحت الإعلامية، أنها تأذت كثيرًا جدًا من الإهانات التي تعرضت لها بسبب ريم البارودي والهاشتاجات، «أنا والله وحياة أولادي ما عاوزة غير إن الناس تسيبني في حالي، بس لو إتنازلت عن القضية على الهواء هيقولوا علينا متفقين قبل الحلقة وممكن ولادي يزعلوا مني، أنا مش صعبة، أنا ممكن أتنازل عادي بس مش مسامحة، على مستوى القانون الدنيوي معنديش مانع أتنازل، بس ربنا ياخدلي حقي»، فيما قامت إيناس الدغيدي، بمطالبتها بإعلان التنازل بشكل رسمي، وأعلنت أنها ستقوم بالتنازل عن البلاغ المقدم ضد البارودي.
