شاهد.. عمرو أديب: اتحاد الكرة "طموحليس" مين اللي وصلنا لكده؟

أكد الإعلامي عمرو أديب، أن الاتحاد المصري لكرة القدم لا يمتلك الطموح، مشيرًا إلى أن كل ما يخطط له هو الوصول إلى نهائيات كأس العالم.

وقال أديب خلال برنامج 'الحكاية' المذاع على قناة 'إم بي سي مصر': 'ممكن أبقى صريح معاكم اللي بيخطط للكرة المصرية بيفكر في إيه وإحنا عايزين إيه، أنا عايز أسأل سؤال هو حضراتكم عايزين توصلوا كأس العالم ونقطة؟ بعد اللي عملته المغرب إحنا في تحدي آخر هو إحنا هنفضل عمرنا كله نصل كأس العام والتمثيل المشرف وترجع؟'.

وأضاف: 'إيه التخطيط الاستراتيجي؟ اتحاد الكرة ده مخطط لإيه، أقولكم هما بيفكروا فيه إيه؟ يقولك هو حسام حسن يجي ويعمل الكام ماتش دول ونوصل كأس العالم وبعدين نجيب مدرب أجنبي، أنا بقولكم دا التفكير، أنت عايز إيه؟ المنتخب ده لو راح كأس العالم مركزه كام؟ الـ48'.

وتابع: 'إنت النهاردة في مصر سمعت حد بيقولك أنا عايز اروح كأس العام وأعمل فرق؟ أسمع المغاربة بيكلموا ويقولوا إيه كانوا طماعين المرة اللي فاتت وعايزين الكأس، أنت كمصر عايز إيه؟ أنا أهو وصلتك كأس العالم ده وأدي تذاكر الطيارة وأبقى روح ديزني لاند واتبسط ونبقى نتقابل'.

وأوضح: 'أنت سمعت حد في مصر بيتكلم عن طموح كأس العالم، دا اتحاد طموحليس ليس له طموح هو بيشتغل بالقطعة يقولك ما أنت عارف الظروف وأنت عارف إحنا كنا عاملين إزاي، هو مين اللي عمل فينا كده ومين اللي وصلنا للمرحلة دي؟ أنتوا كل اللي في دماغكم وفي دماغي ودماغ الدنيا كلهم حلم الوصول للمونديال طيب وبعدين؟ لما وصلت المرة اللي فاتت حصل إيه؟ فاكر أنا كنت هناك'.

وذكر: 'هي دي مصر اللي هي أول بلد في القارة الإفريقية كلها لعبت كورة، الأسامي الموجودة دي لما أتكلم على زيزو وتريزيجية وصلاح ومرموش ومصطفى محمد بنتكلم عن محترفين كبار دول يجيبوا إيه؟'.

واختتم: 'يقولك أصل هما سافروا أنت عارف الشناوي ده الفترة اللي فاتت دي كان بيركب كام طيارة وبيسافر كام حته ولا حد قال حاجة وقتها ولما ده يحصل يقولك الحرارة'.