آداب الدعاء

اسمحولي في هذه المقالة التحدث بالعامية، كل الناس من جميع الرسالات السماوية بتدعي ربنا بكل اللي تتمناه، زي أدعية تمني النجاح والتوفيق والفلاح والستر والبركة، أو أدعية مختصة بالآخرة زي القرب من الجنة والبعد عن النار.

لكن للأسف فيه ناس عندها سرعة في الدعاء بشكل سلبي زي مثلا حد يدعي على ولاده أو على نفسه أو على حد تاني معملش حاجة تستدعي دعوة سلبية لمجرد غيرته منه مثلا وملوش حق في دعوته لأنه مش مظلوم.

طبعا كل ده ممكن يبقى ليه أثار سلبية لو الدعوة تمت في وقت إجابة، وساعتها ممكن اللي دعى يخسر نفسه أو ولاده أو ماله لو دعى عليهم، أو يتسبب لشخص مظلوم في أزمة نفسية وضغط نفسي وجلد ذاتي لو الشخص المدعو عليه ده شعر بذنب معملوش أو ميقصدوش.

إزاي تلتزم بآداب الدعاء عشان تبقى مقبول عند ربنا ومتضرش لا نفسك ولا غيرك؟

1- متدعيش على نفسك ممكن تخسر نفسك فيها.

2- متدعيش على ولادك ولا على مالك عشان متضرهمش.

3- ادعي دايما بالهداية والخير لنفسك وغيرك في الدنيا والآخرة.

4- ادعي الأدعية المأخوذة من الرسالات السماوية بالقرآن الكريم أو الإنجيل المقدس «كلا حسب ديانته»، وما هو مأخوذ من أدعية الأنبياء.

5- لو مظلوم أفضل الدعاء «حسبي الله ونعم الوكيل».

6- لو مش حافظ دعاء معين مش مشكلة ادعي من قلبك بما تريد لربك حيسمع لك ويستجيب لك.

7- ادعي وانت موقن بالإجابة، ولا تيأس لو محصلش نتيجة لدعاءك لأنه إما مؤجل لحين ما تقدر عليه في وقت خير ربنا كاتبه، أو هيكتب بها حسنة أو يحط بها سيئة، لكن مفيش دعوة بتروح.

8- ادعي بما تفهمه ومتدعيش بكلام مش فاهمه، واخشع وابكي أثناء الدعاء لتنال الاستجابة والرضا من الله.

9- تذكر إنك بتدعي ربنا مفيش وسيط بينه وبينك في الدعوة، خليك عندك ثقة فب ربنا بنصرة الحق وكتابة الخير.