عاجل| شقيق أحمد رفعت: إحنا مبنحبش نتبلى على حد.. لو في اسم تاني هقوله

أكد محمد رفعت، شقيق اللاعب الراحل أحمد رفعت لاعب مودرن سبورت أن الأسرة ترغب في أن يحاسب أي شخص تسبب في أذى لشقيقه الراحل.

وقال رفعت خلال برنامج 'الماتش' المذاع على قناة 'صدى البلد': 'مراسم العزاء كانت قاسية، أنت واقف بتاخد عزاء أخوك ضهرك وسندك في الدنيا، حاجة قاسية جدًا ولكن كانت خفيفة وربنا يرحمه ويحسن إليه'.

وأضاف: 'إحنا بس محتاجين إن لو في حد أذى أحمد يتحاسب وأن ده ميحصلش مع حد تاني ولكن إحنا لا في انتظار حاجة مادية ولا حاجة خالص، إحنا مرتاحين جدًا وأحمد مريحنا لسنين قدام، الموضوع ده مش محتاج كلام ولكن اللي غلط في حق أحمد يتحاسب عشان الناس التانية'.

وتابع: 'أحمد مات ومفيش حاجة ترجعه، وأنا حابب أشكر كل الإعلاميين المحترمين اللي بيتكلموا في القضية، إحنا مش متابعين أي حاجة وأنا لما طلعت اتكلمت في الأول وذكرت الاسم كنت بوصل رسالة أخويا وخلاص'.

وأكمل: 'أنا مرتاح جدًا وأنا ذكرت الاسم لراحته هو عشان يبقي مرتاح في قبره الله يرحمه، الدكتور وليد دعبس رئيس مودرن سبورت السابق كلمني وقال إن اللي قاله عن أحمد مش زي ما اتفهم على السوشيال ميديا، دكتور وليد من اليوم الأول كان بيتابع مع أحمد أول بأول وأحمد شكره وقال دا والدي، الرجل ده مش محتاج كلام والدكتور وليد اتواصل معايا يومها الساعة 4 الفجر وكلمني'.

وواصل: 'بنشكر الناس كلها ومفيش أسماء موجودة ومفيش حد يظلم لأن إحنا مبنحبش نتبلى على حد الاسم الوحيد اللي ذكر من أحمد الله يرحمه كان اسم واحد وإحنا لو نعرف اسم تاني هقول عليه، أنا هداريه ليه؟ لا حد يعرف يهددنا أو يضغط علينا واللي معاه ربنا مبيخافش'.

وذكر: 'أنا لو في اسم تاني عارفه هقوله، أنا لو قلت وحصلي حاجة هيبقى معروف مين وإحنا مش في غابة'.

وكان محمد رفعت قد أشار في مداخلة سابقة إلى أن أحمد دياب رئيس رابطة الأندية يعرف جيدًا ما حدث لشقيقه الراحل.

وقال رفعت: 'الحمد لله على كل حال، لم يتم التقصير طبيا مع أحمد رفعت، بس الأذى بتاع أحمد رفعت أذى نفسي'.

واختتم: 'مش هتكلم كتير بس اسألوا أحمد دياب رئيس رابطة الأندية يقول اللي حصل لأحمد رفعت بسبب إيه؟'.