'البعبع' كان كوميدي بالنسبة لي، أمير هو اللي عمل الأكشن، في 'المشروع X' الأكشن كان أكثر وجاد أكثر... هكذا وصفت الفنانة ياسمين صبري دورها في فيلمها الجديد 'مشروع X'.

تحدثت ياسمين صبري عن دورها في فيلم 'المشروع X' في لقائها بالإعلامي عبد العزيز أحمد في برنامج 'مساء الإمارات' على قناة 'الظفرة' قائلة: دوري مختلف فعلا في 'المشروع X' المخرج بيتر ميمي كان دايما بيوجهني إني مطلعش بره الشخصية، لإن نبرة صوتي ساعات بتقع فكان دايما مخليني محافظة على الكلام بتون أعمق وده مش طبيعة صوتي.

وأضافت ياسمين: وكمان الشخصية اللي بقدمها في الفيلم كلامها قليل ومحسوب قوي (ما قل ودل)، بتعبر أكتر عن طريق الحركة والأكشن، وده دور أنا عمري ما عملته، بس أنا حبيت الأكشن قوي وحسيت إنى اتحطيت في المكان الصح.

وعن إمكانية تقديم أعمال درامية قصيرة للمنصات قالت ياسمين صبري: عمري ما عملت شغل لمنصات، أنا بحب موسم رمضان، بحس الناس كلها بتستنى إعلانات رمضان ودراما رمضان، وهو ده البطولة السنوية زي 'الشامبيونزليج'، وأنا بحب اتواجد في الموسم القوي.

وأكملت: في (الأوف سيزون) ما بيبقاش عندي وقت كمان، بكون بعمل حاجات تجارية شوية بره التمثيل، أو بكون بصور فيلم، مبعرفش أدي وقت قوي لأعمال المنصات للبلات فورمز مع ان هو ده المستقبل كله.

وعن إمكانية المشاركة في مسرحية من مسرحيات 'موسم الرياض' قالت ياسمين صبري: بخاف من المسرح، وبحس إنه محتاج إمكانيات وعاوز حد بتاع مسرح أو عنده خبرة.