تحدثت الفنانة صبا مبارك عن تفاصيل مشاركتها في مسلسل «ورد على فل وياسمين» والأسباب التي دفعتها لقبول الشخصية والتحضيرات لها قبل البدء بالتصوير، مؤكدة أنها خضعت لحمية غذائية لتخسر بعض الوزن ويتناسب شكلها مع شخصية «إلهام» التي تقدمها في العمل، وقالت: «ضعفت عشان الشخصية تعبانة فيبقى باين عليها، وخلينا عندها نمش عشان هي بتمشي كتير في الشمس، حاولنا إضافة تفاصيل كتير حتى لو الناس مأخدتش بالها، في اللبس كان عندي طلب واحد إننا منروحش في حتة أوفر، يعني لبس ملون كتير، لو اشترينا من أماكن غالية أو من الوكالة اللي بيحب يلبس حلو بيلبس حلو أنا شايفاها كده».

وأضافت صبا خلال لقائها في برنامج «الحكاية»: «شركة الإنتاج عرضوا عليا مشروعين واحد منهم «ورد على فل وياسمين» وكانوا شايفين أن العمل التاني شبهي أكتر، وأنا حبيت شخصية «إلهام» وكان عندي تعاطف كبير معاها شايفه فيها البنت العربية بشكل عام وبالذات البنت المصرية بعيدا عن كل الحاجات والصورة اللي بنشوفها في الدراما ومش عايزة أعمم اللي هي فيها طريقة فجة في الكلام وعشوائية بزيادة».

وتابعت: «ملقتش الشخصية دي من نفسي، دي ناس موجودة أنا واحدة من المساعدين اللي معايا كانت كده بنت لذيذة وطيبة وبتلبس كويس وبتحاول بجهدها في كل تفاصيل حياتها عندها مشاكلها ممكن تبقى ساكنة في حته شعبية بس مش لازم تلبس لبس معين».