احذروا فخ تمديد الهدنة

خاص بـ (الانتباهة)

اقل من (٤٨) ساعة هي ما تفصلنا عن إنتهاء هدنة (جدة) . سارعت قوات المتمردين تبدئ رغبتها في التمديد . قرات تصريح قبل قليل منسوب للجيش لم يصدر بموقعه الرسمي مما يجعلني اجزم انه مما تحمله الوسائط من الطلس .

يفهم منه عدم الممانعة …!

طيب …

خلونا نفترض ….

انو الجماعة ديل اتفقوا تب على تمديد الهدنة فتعالوا نتحاسب و الحساب شنو يا جماعة …..

ايوااا الحساب (ولد)

فهل اخلى …

المتمردون المستشفيات والمرافق العامة

لا والله قاعدين …

سمح ….

هل خرجوا من بيوت الناس الكسروها و سرقوها واتخذوها مسكنا ؟

لا والله ياحاج عثمان

قاعدين يشربوا في الشاهي كمان

طيب خرجوا من مرافق الدولة الخدمية كالكهرباء والماء وهل عفت ايديهم وانفسهم عن السطو والنهب وانتهاك الحرمات؟

ابدا والله الحكاية دي شغااالة ….

هل اوقفوا ارتكازاتهم وتفتيش وابتزاز الشعب وسلبه تحت تهديد السلاح

والايذاء اللفظي

قال ليك ….

عشان اكون صادق معاك شوية

الحكاية دي خفت الايامات دي لكن موجودة

هل تطبعت الحياة وعاد اصحاب المهن الحرة لاسواقهم يسترزقون الله ؟

والله ياخ لسه

الا ستات الشاهي وبائعات الطعام الحصريات جدا جدا لخدمة الدعامة ديل قالوا اطبعت حياتهن (تمامن)

وقال ليك …

كمان قروش جدييييدة موس بس تجرح

اذا ما الذي نفذ من الهدنة ؟

هل شفتوا اغاثات ، واحد فيكم سمع بطيارة ادوية نزلت ، ياخ شوية التمر الناشف ده ده فيكم زول شافو ؟

اذا بماذا يجعجع الوسطاء؟

اهااا يا جماعة

الشبعااان وبشرب شاهيهو تلاته مرات في اليوم منو من سكان الخرطوم؟

قال ليك الدعامة بس وستات الشاهي

فهمت علي ..!

بي قروش منو؟

وجابوها من وين ؟

والله ما تسالني ! البندقية قاعدة

واسأل العنبة

إذا اين بنود الهدنة ؟

كلام فقط وزخم اعلامي اليس كذلك؟

هذه الايام ….

يسعى المزوراتي فولكر

(بركت من صلي وقال يالله تنشف عضيماتو وتيبس جضيماتو)

لاهثا هذه …

من اجل تسويق تمديد الهدنة بالتزامن مع اصدقاء الرفيق الشيوعي مالك عقار من الافارقة .

ولكن ما لا جدال حوله ان

الشعب يريد شيئا آخرا من جيشه هو ….

الحسم ولا شئ غير الحسم لما تبقى من جيوب التمرد المتناثرة والجيش يعلم ذلك ويقدر الصبر والمعاناة لذا عليه (برايي) ان لا يمارس السياسة هذه الايام نهاااائئ و باي درجة من درجاتها

باستثناء تلك التي يقوم بها المبعوث الخاص للبرهان السفير دفع الله .

وليتفرغ تماما لشغلو

اما خطرفات الافارقة التي ظهرت بالامس اعتقد ان

(راس مالها) ….

كلمتين فقط

الانسحاب من الاتحاد الافريقي ومع السلامة يا حمامة

وليتمتع الرفيق عقار بما لذ وطاب له من مآكل و مشاريب مدينة جوبا التي اتخذها مقرا له لحكم السودان عبر بيانات الواتساب

واخيرا ….

ايها الشعب الكريم الصابر الصامد

عدوا معي ما تبقى من ساعات على انقضاء مدة الهدنة

التي برأي ما اريد منها الا تحييد الطيران وكف يد الجيش الباطشة

ويااااعمك

مننن عشرة إلا ربع مساءا بعد بكرة

( الحفلة صباحي)

والبرهان إن فعلها بلع كل العالم لسانه

(فاهمني يا أسطى)؟

العزة للسودان و لجيشه

ولا نامت اعين الجبناء والعملاء والمرتزقة والخونة