عمرو سلامة: أنا اتحبست في دور الشخص المثير للجدل

تحدث المخرج عمرو سلامة عن تصريحاته التي يقولها في أي برنامج يظهر فيه أو يكتبها عبر حساباته في مواقع التواصل الاجتماعي وكثيرا ما تسبب له أزمات.

وقال عمرو سلامة خلال لقائه في برنامج 'كلاكيت': 'أنا اتحبست في دور الشخص المثير للجدل معرفش ليه مع أن أنا في الحياة مش كده، ومش عارف بقول إيه مثير للجدل للدرجة دي يمكن أنا غلطان معرفش مش المفروض اتكلم وأقول اللي في دماغي زي ما هو بس'.

وتابع عمرو سلامة: 'أنا فاكر وأنا صغير لما كانوا يقولوا إيناس الدغيدي قالت كذا أو يوسف شاهين قال كذا وخالد يوسف قال كذا وأنا في أوقات كتير بقول هو ليه الناس متعصبة من تصريحاتهم، في أوقات كتير جدا لما بقول حاجة أو يطلع مني تصريح يعمل جدل أو يعمل خناقات أونلاين ساعات بحس أن دا مفيد وساعات لأ أنا مش مستحمله، يعني في أوقات كتير جدا بحس أنه مفيد أننا نفتح موضوع زي دا ونتناقش فيه كمجتمع ونكتشف إيه الصح وإيه الغلط وفي أوقات بحس أن المفروض تعدي ولا حد يستوقفها'.

واختتم عمرو سلامة كلامه: 'العصر دا مصيبته أنك طول الوقت ماشي في حقل ألغام بتقول أي تصريح في تليفزيون أو برنامج أو على النت ممكن تلاقي نفسك دوست على لغم وأنت مش واخد بالك خالص وأنت فاكر أن الكلام محدش هيقف عنده بتقول اللي جواك زي ما تكون قاعد مع صاحبك على قهوة لكن كل يوم الواحد بيتأكد أن الموضوع فاتورته غالية'.

يذكر أن عمرو سلامة عرض له مؤخرا مسلسل 'بريستيج'.

تدور أحداث 'بريستيج' حول عاصفة قوية تضرب شوارع القاهرة، مما يجبر 14 شخصا من خلفيات اجتماعية مختلفة إلى اللجوء إلى مقهى في وسط البلد. بعد انقطاع الكهرباء وعودتها، يكتشف الجميع أن أحدهم قد قُتل، ومع تصاعد التوترات يدركون أن القاتل بينهم، وهو ما يجعل كل شخص في المقهى مشتبها به ومحققا في نفس الوقت. تتطور الأحداث في إطار من التشويق والكوميديا.

والمسلسل من بطولة محمد عبد الرحمن، مصطفى غريب، راندا عوض، دينا، سامي مغاوري، بسام رجب، آلاء سنان، أمينة البنا، معاذ نبيل، وعمر الشريف، إلى جانب مغني الراب زياد ظاظا و صانع المحتوى عبد العاطي بالإضافة إلى مجموعة من النجوم الذين سيظهرون كضيوف شرف في الحلقات.