محمد حماقي عن التمثيل: مش هعمل أي حاجة مش مقتنع بيها لمجرد أني أكون قدمت سينما

كشف الفنان محمد حماقي سبب تأخر خطوة التمثيل في مشواره الفني.

وقال محمد حماقي في لقائه مع ET بالعربي: 'فيما يخص التمثيل هو مشروع طول الوقت بتمناه ومن أول ما بدأت أغني من وقت 'بتضحك' كان بيتعرض عليا أفكار ومشاريع للتمثيل بس طول الوقت كنت بحس أن مش دا اللي نفسي فيه أو مش دي الفكرة اللي عايز أعملها يمكن لأني مش متخصص أوي'.

وتابع محمد حماقي: 'في المزيكا بقدر أعمل اللي أنا عايزه بقدر أفكر وأروح وأنفذ اللي أنا نفسي فيه بس في السينما مش هعرف اكتب الفيلم، دا اللي معطل المشروع أتمنى أن أعمل ميخلصش المشوار من غير ما يكون في تجربة سينما بس في نفس الوقت مش هعمل أي حاجة مش مقتنع بيها لمجرد أني أكون عملت سينما، مستني الفكرة وإن شاء الله تيجي ولو جات مش هتردد خالص'.

وخلال اللقاء كشف محمد حماقي عن تحضيره لفيلم وثائقي يرصد مسيرته الفنية، وقال: 'أنا شغال على فيلم وثائقي بقالي فترة مش أقل من 10 سنين وإحنا بنصور فيه، بدأنا من وقت طويل جدا وأظن طول المدة دي هيخليه غني وهيخلي فيه مراحل كتيرة موثقة بشكل كويس مش بحكي عن المشوار وخلاص'.

وتابع محمد حماقي: 'هو متأسس بقاله فترة طويلة كل شوية نقول نقفله وبعدين نقول هناخد السنة دي أو الحدث دا معانا هو مشروع مفتوح ولسه مأخدناش قرار نقفله أمتى ونقدمه'.