محمد الشرنوبي عن فترة غيابه: كنت حاسس إني ضايع ومش لاقي نفسي

تحدث الفنان محمد الشرنوبي عن سبب غيابه لمدة 4 سنوات عن عالم الموسيقى والغناء قبل طرحه ألبومه الجديد في رحلة بحثه عن هويته.

وقال محمد الشرنوبي خلال لقائه ببرنامج 'تفاعلكم': 'كنت حاسس إني ضايع ومش لاقي نفسي ومش عارف ألاقي حاجة تكون مختلفة محدش بيقدمها غيري ودا كان شاغلني ولما نبص على الأساطير اللي في التاريخ كان دايما عندهم هوية وحاجة بتميزهم عن غيرهم ولو حد قلدها هيقولوا دا بيقلد، كنت ضايع في الحتة دي'.

وتابع محمد الشرنوبي: 'وكل حد بيلاقي هويته لازم يبقى فاهم صناعة المزيكا وإزاي يصنع أغنية، عملت استديو صغير وابتديت أتعلم من الأول خالص إزاي أعمل أغنية، إزاي اطلع ميكس وماستر بطريقة معينة عشان أطلع صوت مختلف عن الموجود في السوق الرحلة ابتدت من 4 سنين قعدت قافل على نفسي وطلعت حوالي 250 تراك وكنت فاتح ورش كتير مع ناس كتير وكنت ببحث عن هويتي دا بكل بساطة اللي حصل في الأربع سنين'.

وعما وصل إليه بعد هذه الفترة قال محمد الشرنوبي: 'هويتي الجديدة هي هوية معاصرة بطابع شرقي بثقافة مصرية وعصرية جدا شبه اللي بيحصل في السوق العالمي، دا اللي وصلتله وأظن باين في الألبوم، أنا مزيكتي خفيفة جدا بس في الآخر بغني وعندي ثقافة مصرية بعتز بيها جدا'.

وطرح محمد الشرنوبي أحدث ألبوماته 'بعد الليل'.