لوسي: ابني اتربى بطريقة مختلفة وعارف أن مامته ست كويسة

تحدثت الفنانة لوسي عن ابنها الوحيد 'فتحي' وطريقة تربيتها له مؤكدة أنها تخاف عليه من كل شيء.

وقالت لوسي خلال لقائها في برنامج 'ورقة بيضا' مع يمنى بدراوي: 'ابني اتربى بطريقة مختلفة في عالم مش شرقي مفيش احتكاك بالعالم الشرقي، كان في مدرسة أمريكية واتعلم أن في حاجة اسمها بيانو وباليه وأوبرا، أنا ووالده قصدنا يتربى بالطريقة دي'.

وتابعت لوسي: 'أنا ووالده ربيناه على إننا منكدبش ونساعد الناس ولما حد يغلط منردش الغلط لو حد ضربك من أصحابك متضربوش اشتكي'.

وأضافت لوسي: 'فتحي ابني مهذب ومحترم جدا، في البيت عندنا في بيانو وهو بيعزف وعرف أن الرقص فن راقي كل مهنة فيها الكويس وفيها الوحش وعارف أن مامته ست كويسة'.

وأوضحت لوسي أن ابنها يعيش الآن في الولايات المتحدة الأمريكية وتسافر له كثيرا وتمضى معه أوقات طويلة وأنه إذا طلب منها أن تترك كل شيء وتعيش معه بالخارج ستفعل هذا من دون تردد.

على جانب آخر، كانت لوسي سبق وكشفت أنها تفكر في اعتزال التمثيل وأوضحت أن هذا القرار لا يزال قيد التفكير.

وقالت لوسي: 'أنا قلت أنا بفكر في الاعتزال مش قررت اعتزل لأن أنا عندي مسئولية عندي فيلم بخلصه وعندي مسلسل تبع قطاع الإنتاج بس متوقف للظروف المادية، تخلص المسئوليات اللي عليا وأقول أنا من بكرا توقفت عن التمثيل'.

وتابعت لوسي: 'أنا توقفت عن الرقص بمزاجي، لكن التمثيل عشان ورايا ارتباطات قلت إني بفكر اعتزل في حاجات كتير مش عجباني ومش مريحاني ورق بيجيلي مش المفروض يجيلي، أنا غضبانة الطريقة والمواعيد والورق أنا مفتقدة الأستاذ أسامة أنور عكاشة مفتقدة الناس اللي بيطلعوا من جوا قلبي الجملة، بيجيلي ورق بقول يا عيني على القلم اللي اتكتب بيه الكلام الفارغ دا إحنا في تدهور'.