طارق الدسوقي يحكي كيف أنقذه سمير غانم من فقدان البصر

حكى الفنان طارق الدسوقي عن موقف لا ينساه للفنان الراحل سمير غانم وكيف أنقذه من فقدان بصره.

وقال طارق الدسوقي خلال حلوله ضيفا على برنامج 'الستات ما يعرفوش يكدبوا': 'كنت بصور مسلسل 'عزيزة ويونس' في الإمارات وآخر يوم تصوير ليا هناك عيني خدت فيروس نادر جدا لقيتها كلها أحمرت بقت لون الدم وبتجيب صديد وآلام صعبة جدا طول الوقت عايز ضلمة، في نفس التوقيت دا كنت متعاقد على مسلسل 'تزوج وابتسم للحياة' كان بيشاركني فيه أستاذ سمير غانم وأحمد بدير وراغدة ومجموعة كبيرة، كنت هرجع من دبي على بروفات المسلسل'.

وتابع طارق الدسوقي: 'التصوير كان فاضل عليه 15 يوم فلفيت على أكبر دكاترة عيون محدش عرف يشخص الحالة، قررت اعتذر عن المسلسل وابتديت اتشائم إني ممكن اتعمي، روحت عشان اعتذر عن عدم المشاركة في المسلسل وكان أستاذ سمير غانم موجود وحكيت ليه اللي حصل'.

وأكمل طارق الدسوقي: 'أستاذ سمير طلب مني معتذرش عن المسلسل ودخل عمل تليفون ورجع أخدني عند دكتور علي المفتي من أكبر دكاترة العيون في الشرق الأوسط، كان عشان تروح ليه لازم تحجز قبلها بشهرين، أستاذ سمير غانم أخد الميعاد وأخدني، الدكتور كشف عليا وقالي إحنا كنا على أبواب العمى ومش هقدر أقولك هننفد ولا لأ، وأدالي مراهم وقطرات وبعد أيام روحت ليه وقالي أن الحمد لله ربنا أنقذني'.

واختتم طارق الدسوقي كلامه عن سمير غانم: 'كان إنسان جميل، يكفي إني لما قربت منه عرفت أنه كان بيبقى في مسرحيات خلاص عرضها كذا سنة وبيبقى تعب وعايز يخلص المسرحية لكن يكمل عشان الناس اللي بتشتغل معاه'.