هشام جمال: دخلنا المستشفى تالت يوم في شهر العسل ومقولناش لحد

حكى الفنان هشام جمال عن موقف صعب تعرض له وزوجته ليلى أحمد زاهر في ثالث أيام شهر العسل.

وخلال لقائهما في برنامج 'صاحبة السعادة' مع إسعاد يونس، كشف هشام جمال أنه سيحكي لأول مرة ما حدث معهما وأنه لم يخبر عائلته وأصدقائه بأي شيء.

وحكى هشام جمال: 'اللي هنقوله دا أنا مش بهزر وأقسم بالله مفيش بني آدم يعرفه من أهلنا ولا أصحابنا إحنا اتفقنا أننا هنقول بس هما ميزعلوش عشان مكناش عايزين نخضهم وإحنا اتصرفنا، حصل حاجة دمها تقيل شوية في يوم كنا نازلين وأكلنا من مكان لقيناه قدام الأوتيل وكان حلو جدا وإحنا كنا بناكل في شهر العسل كتير جدا، المهم أكلنا منه مرة تانية أنا أكلت 3/4 الساندويتش وليلى ربع وبعدين طلعنا الأوتيل كانت الساعة 1 بالليل، شوية ولقيت ليلى في حالة خمول ونامت وأنا شوية وبطني بدأت توجعني والوجع بيزيد وبقى غير محتمل سكاكين ومش عارف إيه اللي حاصل حاجة مش طبيعية'.

وتابع هشام جمال: 'أخدت دواء للبطن وتعبت أكتر جيت في مرحلة حاجة من اتنين يا هنزل أروح المستشفى من غير ما أصحيها، يا في 3 يوم من شهر العسل هقولها قومي ننزل المستشفى أنا مش قادر ومكنتش عارف أن هي كمان تعبانة، قلت مش هنزل واسيبها عشان متصحاش تتخض والحمد لله أني معملتش كده لأن هي كمان كانت تعبانة، صحيتها قلت لها أنا تعبان شكل الأكل فيه حاجة قالتلي أنا كمان بطني تعباني شوية بس أنا تمام'.

وأكمل هشام جمال: 'نزلنا روحنا المستشفى في أمريكا حيث البرود وقلة الإحساس هما موجودين والمستشفى مش زحمة بس هما باردين، جسمي سخن وتعبان وهي رايحة جايه بتحاول تخلص الورق، قالوا أن دا حاجة في الأكل وأدوني دواء وبعدين بدأت هي تتعب ومكنتش عايزة تبين أنها تعبانة وأخدت نفس الأدوية وقعدنا شوية والحمد لله هي كانت أكلت أقل فتعبت أقل شوية'.

وأضاف هشام جمال: 'كان عندنا طيارة بعد شوية، قمنا مشينا من غير ما نقول لأي حد أي حاجة وطلعنا لمينا حاجاتنا وجرينا عشان نلحق الطيارة وإحنا بنموت من التعب ولحقنا الطيارة فرق 10 دقايق والحمد لله دا اللي ظبط الدنيا ومقولناش لأي حد الموضوع دا'.

وردا على سؤال إن كان يؤمن بالحسد قال هشام جمال: 'قد ما الناس بتقعد تقول خدوا بالكم من نفسكم والحسد وكده قد ما أنا بشوف أن ناس كتير بتدعي وتقول ربنا يحفظكم ويباركلكم وأنا بقول دي بتشيل دي، إحنا مش مؤمنين بفكرة اتحسدنا والجو دا موجود الحسد وكل حاجة، أنا بشوف ناس كتير بتدعي ربنا يسعدكم وأكيد ربنا بياخد بدعوات الناس الحمد لله'.

واحتفلت ليلى أحمد زاهر بزفافها على هشام جمال يوم الأربعاء 23 أبريل في حفل كبير أمام هرم سقارة.

لو فاتك: شطارة مايان السيد في الإجابة على كويز في الفن