استعادت الفنانة رانيا فريد شوقي ذكرياتها مع مسلسل 'سوق الخضار' ومشهد كان سيجمعها بالفنانة فيفي عبده.

ونشرت رانيا فريد شوقي صورة من كواليس المسلسل ظهرت فيها مع فيفي عبده وصلاح عبد الله وكتبت: 'من كواليس مسلسل 'سوق الخضار' مع الجميلة فيفي عبده، كان في مشهد خناقة، فيفي ضربت فيه بنت الجيران علقة محترمة! وأنا واقفة وراها على طول، قلت لنفسي: 'وأنا الجاية… الخناقة اللي بعدها!'.

وتابعت رانيا فريد شوقي: 'وهي مندمجة في الضرب، شدت البنت من شعرها طلعت في إيديها البوستيجة 'الشعر المستعار' اللي كانت مركباها! قولت: 'دي طلعت شعر البنت… أمال أنا بقى هتعمل فيا إيه؟!' دي العلقة اللي فاتت كان مجرد تسخين'.

وأضافت: ' طبعا هي شايفة الخضه اللي علي وشي ضحكت وقالتلي: 'ما تخافيش… بس ثبّتي البوستيجة!'، قولتلها: 'عمر بابا ضربك؟' قالتلي: 'لأ… ده حبيبي!' قولتلها: 'طب ردي الجميل بقى في بنت حبيبك!'.

واختتمت رانيا فريد شوقي كلامها: 'فيفي دمها زي العسل، ومن أطيب الناس والمشهد ده من الذكريات اللي ماتتنسيش هو الحقيقة المسلسل كله كنا بنضحك طول الوقت'.

يذكر أن رانيا فريد شوقي شاركت في رمضان 2025 في مسلسل 'الأميرة: ضل حيطة' و 'حسبة عمري'.