كشف الفنان محمد هنيدي عن رأيه في ما يحدث من القبض على بعض صانعي المحتوى على 'تيك توك'، وكتب تعليقا على بث مباشر ظهر فيه الإعلامي محمود سعد يتحدث عن الأزمة.

ونشر محمود سعد صورة لتعليق محمد هنيدي وكتب: 'النهاردة كنا عاملين لايف على قضية التيكتوكرز واللي بيحصل مؤخرا.. وده رأي معتبر جدا جدا لصديقي العزيز محمد هنيدي كتبه تعليقا على الموضوع وأحب اشاركه معاكم'.

وكتب محمد هنيدي: 'المشكلة مش في الذوق العام ولا فكرة تدخل الدولة، المشكلة أعمق بكتير وهي إن نوع معين من المحتوى 'الشعبوي' اللي فيه حوار شعبي، شوية شتيمة، شوية إيحاءات جنسية بقى بيعجب شرائح كبيرة جدا من الناس، بصراحة حتى إحنا ممكن نوقف نتفرج كفضول، الناس بقت مصدر جذب أكثر من السينما والتليفزيون'.

وتابع: 'ومع كل لايك ومشاهدة بيطلع ناس تانية تسيب شغلها وتقول 'وأنا كمان هعمل كده' في الأول يبدأ لايف بسيط ومع الوقت ومع قلة الفلوس الناس دي تبدأ تزود في الانحدار عشان تجيب مشاهدات والكارثة الجمهور موجود'.

وأكمل محمد هنيدي: 'تيك توك بقت المنصة الأولى في الشرق الأوسط ومصر لو نزلت مول البستان أو مول أركان هتلاقي 70% من الناس عارفين التيكتوكرز واحد واحد بقى عندهم نجوم بيعملوا إعلانات وبيتكرموا وبيتصوروا في كل مهرجان، والنتيجة العقل الجمعي للمجتمع بيتغير الجيل الجديد بقى شايف أن هو ده الصح وده هو النجاح، وناس كتير رغم أنها مش قادرة تعمل زيه لكن بتحس بإحباط، واحد بيشقى 12 ساعة والتاني بيشتم أهله ويقول لفظ خارج ويكسب أكتر منه 10 مرات'.

واختتم محمد هنيدي كلامه: 'أنا مش مع المنع بس صعب ننفي أن في خلل كبير، خلل بيمس العقول والوعي وشكل المجتمع نفسه التأثير حقيقي وخطر جدا على أجيال كاملة'.