خلال لقائها ببرنامج 'ضيفي' الذي يقدمه الإعلامي معتز الدمرداش، على قناة الشرق الإخبارية، استعادت الفنانة نيللي كريم ذكريات بداياتها الفنية وأول أعمالها الدرامية من خلال تعاونها مع الفنانة الراحلة فاتن حمامة في مسلسل 'وجه القمر' عام 2000.

حكت نيللي كواليس مشاركتها في المسلسل بعد تقديمها للفوازير وقالت: 'حد كلمني وقالوا لوالدتي إن مدام فاتن حمامة بتعمل مسلسل وعايزة نيللي في المسلسل ياريت لو تيجي ولا سابوا آجي فين ولا أكلم مين قالوا المعلومة وخلاص ومحدش كلمني بعدها، بعدين حد كلمني عشان مسلسل تاني فوافقت ورحت مبنى صوت القاهرة في الدور الخامس عشان أمضي مسلسل تاني ملوش علاقة بمسلسل 'وجه القمر' قابلت حد قالي إنتي فين دا مدام فاتن بتدور عليكي، قلت لهم هو في حد كلمني بس ولا ساب نمرته ولا أي حاجة فأنا هعرف منين'.

تابعت: 'نزلت للدور التاني في نفس المكان عشان مسلسل 'وجه القمر' وسألوني هتشتغلي هتمضي قلتلهم آه ومضيت، وعرفت ساعتها المخرج أستاذ عادل الأعصر وحكولي إني هطلع بنتها وأولادها أنا وأحمد الفيشاوي وغادة عادل، رحت الاستديو عشان أقابل مدام فاتن حمامة لأول مرة فسألتها هو أنا كل الجرايد شتمتني بعد الفوازير ليه حضرتك اخترتيني، قالت لي أنا عارفة إنك كنتي أول مرة وكويسة، قلت أكيد هي شايفة حاجة أنا مش شايفاها، أنا اعتبر أول حاجة تمثيل مع سيدة الشاشة العربية، وبعدين عرفت إن هي كانت عايزاني وحد تاني مكنش عايزني فقالولها إحنا مش عارفين نوصل لها'.

وتحدثت نيللي كريم عن كواليس العمل مع فاتن حمامة وقالت: 'مدام فاتن حمامة في الحياة كانت شخص متفائل جدًا ومثقفة وعندها خفة دم، الشخص المتفائل بيبص لقدام بنظرة إيجابية وحياته بتبقى مختلفة وبيتقبل كل الأمور الحياتية بصدر رحب'.

أضافت: 'في مرة كان عندنا مشهد غداء ومكناش عارفين هنعمل إيه قعدونا وهو المشهد لمدام فاتن حمامة، لقيت مدام فاتن بتمسك كوباية الشاي وهي بترتعش وتعبت وهيغمى عليها مبقتش فاهمة هو تمثيل ولا بجد من كتر ما الموضوع حقيقي لحد ما لقيت حد من المساعدين بيقولي أقعدي، وقالتلي جملة خليكي طبيعية متمثليش على قد ما الكلمة سهلة على قد ما فعلها صعب'.